Avropa Yenidənqurma və İnkişaf Bankı (AYİB) Asiya İnkişaf Bankı (AİB) və Asiya İnfrastruktur İnvestisiya Bankı (AIIB) ilə birlikdə Azərbaycanda iki günəş elektrik stansiyası layihəsini maliyyələşdirəcəyini elan edib.
GDP xəbər verir ki, bu barədə Bakıda keçirilən 29-cu illik İqlim Dəyişikliyi Konfransında (COP29) elan edilib.
Üç bank Azərbaycanda ümumi gücü 760 MVt olan iki günəş elektrik stansiyasının tikintisini dəstəkləyərək 160 milyon ABŞ dolları ayıracağqla
İki layihənin investorları olan “Masdar” və “SOCAR Green”, artıq Qafqazın ən böyük bərpa olunan enerji layihələri olan Biləsuvar və Neftçalada 445 MVt və 315 MVt olan günəş parklarının təməlini qoyublar və onları 2027-ci ildə istifadəyə verməyi planlaşdırırlar.
Bu, Azərbaycanın 2030-cu ilə qədər bərpa olunan enerjinin ümumi elektrik istehsalında payını 30 faizə çatdırmaq məqsədinə nail olmaq yolunda mühüm addımdır.
AYİB-in Dayanıqlı İnfrastruktur Qrupunun idarəedici direktoru Nandita Parşad deyib: “Biz Qafqazda bu günə qədər ən böyüyü olan və ildə 600 000 tondan çox CO2 qənaət edən bu günəş stansiyalarını maliyyələşdirməkdən çox məmnunuq. 300.000-ə qədər evin yaşıl enerji ilə təchiz edilməsinin real dünya təsirinə əlavə olaraq, bu əhəmiyyətli investisiya regionun bütün bərpa olunan enerji bazarını dəyişdirəcək.”
AYİB iqlim fəaliyyətinin maliyyələşdirilməsində və iqtisadiyyatları üzrə özəl sektorun maliyyələşdirilməsində liderdir. Təkcə 2023-cü ildə Bank 6,5 milyard avrodan çox yaşıl maliyyələşdirmə təmin edib ki, bu da onun ümumi investisiyasının 50 faizini təşkil edir.
AYİB həm də Qafqazda ən böyük institusional investordur və 30 ildən artıqdır ki, Azərbaycanda fəaliyyət göstərir. Bank 191 layihə vasitəsilə Azərbaycana 3,7 milyard avrodan çox sərmayə qoyub.
Qeyd edək ki, EBRD, ADB və AIIB tərəfindən maliyyələşdiriləcək 445 MVt-lıq Biləsuvar və 315 MVt-lıq Neftçala günəş enerjisi layihələrinin ümumi dəyərinin 670 milyon ABŞ dolları təşkil edəcəyi gözlənilir.