ABB-nin 2025-ci ilin 1-ci rübündə ümumi aktivləri 14,3 milyard manat səviyyəsində qeydə alınmış ki, bu da əvvəlki ilin müvafiq dövrü ilə müqayisədə 700 milyon manat və ya 5,1% artım deməkdir.
GDP bankın maliyyə hesabatına istinadən xəbər verir ki, bu artım əsasən kredit portfelindəki 115 milyon manatlıq və ya 1,8% və qiymətli kağızlar portfelindəki 373 milyon manatlıq yəni 11,8% artımla izah olunur.
Bankın mənfəətlilik göstəricilərində qeyri-bərabər vəziyyət müşahidə olunur. Xalis faiz gəliri 170,3 milyon manat həddində qeydə alınmış ki, bu da keçən ilin müvafiq dövrü ilə müqayisədə 6,6 milyon manat və ya 4% artım deməkdir. Lakin xalis mənfəətində 65,7 milyon manat olaraq, əvvəlki ilin 80,6 milyon manatı ilə müqayisədə 14,9 milyon manat və ya 18,5% azalma müşahidə edilib. Bu kəskin azalmanın əsas səbəbləri arasında qeyri-faiz xərclərinin 33,6 milyon manat və ya 34,8% artaraq 130,2 milyon manat olması və mümkün zərərlər üçün yaradılan ehtiyatların 5 milyon manat yaxud 15,7% artımı durur.
Likvidlik vəziyyəti ilə bağlı qeyro-müəyyənlik hökm sürür. Ümumi likvidlik “gap”ı -5,89 milyard manat təşkil edir ki, bu da bankın qısamüddətli öhdəliklərini ödəmək üçün kifayət qədər likvid vəsaitə malik olmadığını göstərir. Xüsusilə, 1-7 günlük likvidlik çatışmazlığı 801,8 milyon manat həddindədir. Bununla belə, bankın 6 ay-9 ay müddətində 720,3 milyon manat müsbət likvidlik “gap”ı var ki, bu da orta müddətli likvidlik vəziyyətinin nisbətən yaxşı olduğunu göstərir.
Kredit portfeli 6,47 milyard manat həddində qeydə alınmışdır ki, bu da əvvəlki ilin müvafiq dövrü ilə müqayisədə 115 milyon manat və ya 1,8% artım deməkdir. Portfelin tərkibində biznes kreditləri 3,15 milyard manat və ya 1,2% artım, istehlak kreditləri 1,87 milyard manat (4% artım) və daşınmaz əmlak kreditləri 1,45 milyard manat (0,7% artım) təşkil edir.
Depozit bazası 12,2 milyard manat həddindədir ki, bu da əvvəlki ilin müvafiq dövrü ilə müqayisədə 628,6 milyon manat və ya 5,4% artım deməkdir. Fiziki şəxslərin depozitləri 10,13 milyard manat (1,2% artım), hüquqi şəxslərin depozitləri isə 2,72 milyard manat (1% azalma) olmuşdur.
Kapital strukturuna gəldikdə, bankın I dərəcəli kapitalı 2,12 milyard manat həddində qeydə alınmış ki, bu da əvvəlki ilin müvafiq dövrü ilə müqayisədə 72,1 milyon manat və ya 3,5% artım deməkdir. Ümumi kapital 2,33 milyard manat təşkil edir ki, bu da normativ tələblərdən xeyli yüksəkdir.
Pul vəsaitlərinin hərəkəti baxımından, əməliyyat fəaliyyətindən -111,5 milyon manat mənfi pul axını, investisiya fəaliyyətindən 190,7 milyon manat müsbət pul axını və maliyyələşdirmə fəaliyyətindən 294,3 milyon manat müsbət pul axını qeydə alınmışdır.
Risk profili baxımından ən narahatlıq doğuran amil bankın aktivlərinin 76,6%-nin (465 milyon manat) 100% və daha yüksək risk qrupuna aid olmasıdır. Faiz riski baxımından isə bankın 494,7 milyon manat faiz həssaslığı olan aktivləri var.