Uinklvoss əkizlərinin qurduğu Gemini Space Station şirkəti uğurlu IPO keçirərək 425 milyon dollar vəsait cəlb edib. Səhmlərin dəyəri ilkin yerləşdirmə qiymətindən 64% artaraq şirkətin bazar kapitallaşmasını 4 milyard dollara çatdırıb.
Uinklvoss əkizləri əvvəllər sosial şəbəkə ideyası ilə bağlı Mark Zukerberqlə məhkəmə çəkişmələri ilə tanınıblar. 2008-ci ildə onlar Facebook-un yaradıcısından 65 milyon dollar kompensasiya alıblar.
2012-ci ildə 1 milyon dollarlıq investisiya ilə bitkoyna sərmayə qoyan əkizlər kriptovalyutaya ən erkən investorlar sırasında olublar. 2014-cü ildə isə Nyu-York Maliyyə Xidmətləri Departamentinin lisenziyası ilə Gemini adlı kriptobirja təsis ediblər.
2017-ci ildə bitkoynun qiyməti 20 min dollara yüksəldikdə Uinklvoss qardaşları ilk kriptomilyarderlər elan olunublar. 2021-ci ildə onların sərvəti 6–8 milyard dollar arasında qiymətləndirilirdi.