Azərbaycanda mikro, kiçik və orta sahibkarlığın maliyyələşməsinə dəstək verən banklar arasında Bank Respublika və AccessBank beynəlxalq maliyyə qurumlarından ən çox vəsait cəlb edərək, borclanan banklar kimi ön plana çıxır.
GDP xəbər verir ki, Bank Respublika ölkə iqtisadiyyatını dəstəkləmək məqsədilə beynəlxalq maliyyə qurumlarından ümumi dəyəri 115.95 milyon ABŞ dollarından çox (197.115 milyon manat)olan vəsait cəlb edib. Bankın beynəlxalq tərəfdaşları arasında Qara Dəniz Ticarət və İnkişaf Bankı (BSTDB), Avropa Yenidənqurma və İnkişaf Bankı (EBRD), Cənub-Şərqi Avropa üçün Avropa Fondu (EFSE), Niderland İnkişaf Bankı (FMO) və Beynəlxalq Maliyyə Korporasiyası (IFC) kimi nüfuzlu qurumlar yer alır.
Digər tərəfdən, eyni sahədə fəaliyyət göstərən AccessBank isə müxtəlif beynəlxalq maliyyə qurumlarından ümumi dəyəri 58 milyon ABŞ dollarından çox (98.6 milyon manat)olan vəsait cəlb edib.
Bu rəqəmlər Bank Respublikanın Azərbaycanda beynəlxalq maliyyə institutları tərəfindən ən çox etimad göstərilən və dəstəklənən banklardan biri olduğunu nümayiş etdirir. Cəlb edilən vəsaitlər əsasən kiçik və orta sahibkarlığın maliyyələşdirilməsinə, həmçinin yaşıl iqtisadiyyat və davamlı inkişaf layihələrinə yönəldilir.
Müəllif: Aynur Qəniyeva