Türkiyə Cümhuriyyəti Mərkəzi Bankı (TCMB) iyun ayı üzrə faiz qərarını açıqlayıb.
GDP xəbər verir ki, Bank uçot dərəcəsini dəyişməyərək 46 faiz səviyyəsində saxlayıb.
Bankın İdarə Heyəti Mərkəzi Bankın bir gecəlik borcvermə dərəcəsini 49 faiz, bir gecəlik borclanma faizini isə 44,5 faiz səviyyəsində saxlayıb.
İqtisadçılar da TCMB-nin faizini 46 faiz səviyyəsində sabit saxlayacağını gözləyirdilər.
TCMB aprel ayında uçot dərəcəsini 42,5 faizdən 46 faizə qaldırmağa qərar vermişdi. İdarə Heyəti bir gecəlik borcvermə faizini 46 faizdən 49 faizə, bir gecəlik borclanma faizini isə 41 faizdən 44,5 faizə qaldırmışdı.
Türkiyə Cümhuriyyəti Mərkəzi Bankı (TCMB) əsas faiz dərəcəsi və faiz dəhlizində heç bir dəyişiklik etməsə də, inflyasiyanın və tələbin əsas meylinin azaldığına diqqət çəkib. Bank “İnflyasiyanın əhəmiyyətli və qalıcı şəkildə pisləşməsi halında” atılacaq addımlarla bağlı qərar mətnində də dəyişiklik edib.
Qərar mətnində inflyasiyanın əsas meylinin may ayında azaldığı bildirilib, aparıcı məlumatların əsas tendensiyanın iyun ayında da davam etdiyinə işarə etdiyi qeyd edilib.
İkinci rübün məlumatlarının daxili tələbin yavaşladığını göstərdiyi vurğulansa da, geosiyasi proseslərin və qlobal ticarətdə artan proteksionizmin inflyasiya prosesinə mümkün təsirlərinin də yaxından izləndiyi bildirilib.