ABB-nin İdarə heyətinin sədri Abbas İbrahimov bildirib ki, bank Unudulmaz sənətkar Rəşid Behbudovun 110 illik yubileyi münasibətilə onun itirilmiş bir portretini bərpa edib.
GDP xəbər verir ki, Xalq rəssamı Asəf Cəfərov tərəfindən 50 il əvvəl çəkilən və Şuşa Rəsm Qalereyasına hədiyyə edilən əsər, Ermənistanın işğalı dövründə itmişdi. ABB-nin təşəbbüsü ilə bərpaçı-rəssam Natiq Səfərov orijinala sadiq qalaraq tablonu 1975-ci ildəki görkəmində yenidən yaratmışdır.
Abbas İbrahimov qeyd edib ki, bu, sadəcə rəsm deyil, arxiv və xatirələr əsasında bərpa olunmuş mənəvi dəyərdir. O, “ABB olaraq bizi qürurlandıran mənalı bir KSM layihəsini həyata keçirdik”,-deyə bildirib.
Yenidən yaradılan portret ilk dəfə Azərbaycan Milli İncəsənət Muzeyində keçirilən yubiley sərgisində nümayiş etdirilib. Sərgidən sonra əsər yenidən Şuşa Rəsm Qalereyasına təqdim olunacaq.
ABB-nin rəhbəri bu təşəbbüsdə dəstəyini göstərən Mədəniyyət naziri Adil Kərimliyə, millət vəkillərinə və mədəniyyət xadimlərinə təşəkkür edib.
