Kapital Bank beynəlxalq maliyyə bazarında mühüm uğur əldə edərək, öz tarixində ilk sindikatlaşdırılmış kredit sazişini imzalayıb.
GDP xəbər verir ki, Körfəz regionunun aparıcı bankı olan “Mashreq Bank”ın təşkilatçılığı ilə həyata keçirilən tarixi saziş mərasimi 11 noyabr 2025-ci il tarixində Dubay şəhərində keçirilib. Sənədi hər iki bankın rəhbərləri imzalayıb. Əməkdaşlıq çərçivəsində Kapital Bank-a 50 milyon ABŞ dolları həcmində sindikatlaşdırılmış kredit vəsaitinin cəlbi nəzərdə tutulur.
Kapital Bank-ın İdarə Heyətinin sədri, Baş İcraçı direktor Fərid Hüseynov bu əməkdaşlığı yüksək qiymətləndirərək bildirib ki, bu, bankın maliyyə dayanıqlılığını artırmaqla yanaşı, Azərbaycanın maliyyə sektoru üçün yeni beynəlxalq imkanlar yaradır.
“Bir ekosisteminin əsas hissəsi olaraq gələcək hədəfimiz beynəlxalq tərəfdaşlıqları keyfiyyətcə yeni səviyyəyə qaldırmaqdır. Biz bu resursları ölkəmizin rəqəmsal transformasiya prosesini gücləndirməyə və uzunmüddətli dayanıqlı iqtisadi inkişafı təmin edən layihələrə yönəldərək ölkə iqtisadiyyatına dəyər qatmağa davam edəcəyik”, – deyə Fərid Hüseynov qeyd edib.
Qeyd edək ki, Azərbaycan bankları beynəlxalq maliyyə bazarında fəallığını artırır. Bundan əvvəl, 21 aprel 2025-ci il tarixində Azərbaycan Beynəlxalq Bankı (ABB) Birləşmiş Ərəb Əmirliklərinin Dubay şəhərində, Mashreq Bank-ın ofisində 200 milyon ABŞ dolları dəyərində sindikatlaşdırılmış kredit müqaviləsi imzalamışdı.