“Azərbaycan Beynəlxalq Bankı” ASC (ABB) 2026-cı il üçün dövlət büdcəsinə 150 milyon manat dividend ödəməsi nəzərdə tutulur.
GDP-nin məlumatına görə, bu barədə Hesablama Palatasının “2025-ci il dövlət büdcəsi haqqında” qanun layihəsinə verdiyi Rəydə bildirilir.
Sənəddə qeyd olunur ki, bu məbləğ 2025-ci ilin təsdiq olunmuş proqnozu ilə müqayisədə dəyişməyib.
Həmçinin Rəydə göstərilir ki, bank bu ilin yanvar-avqust aylarında 175,1 milyon manat dividend ödəyib və proqnozu 116,7 % yerinə yetirib.
Beləliklə ABB-nin 2026-cı ildə nəzərdə tutulan dividend ödənişi, 2025-ci ildə ödənilən məbləğlə müqayisədə 25,1 milyon manat və ya təxminən 14.3% azalmışdır.
Qeyd edək ki, ABB 2022-ci ildə 125 milyon manat, 2023-cü ildə 156,6 milyon manat, 2024-cü ildə isə 185 milyon manat dividend ödəyib. Səhmbaşına düşən dividend isə müvafiq olaraq 2,8 qəpik, 3,4 qəpik və 4,1 qəpik təşkil edib.
ABB haqqında:
Bank 1992-ci ildə yaradılıb. Onun nizamnamə kapitalı 1 milyard 282,183 milyon manatdır. Bankın səhmlərinin 88,54 %-i Maliyyə Nazirliyinə, 3,64 %-i İqtisadiyyat Nazirliyi yanında Əmlak Məsələləri Dövlət Xidmətinə, 0,22 %-i “Aqrarkredit” QSC-yə, 7,6 %-i isə fiziki və hüquqi şəxslərə məxsusdur.