GDP -nin məlumatına görə, o bildirib ki, bu il ilk dəfə Dünya İqtisadi Forumunda iştirak edib və Davosda keçirilən mötəbər tədbirdə ABB-ni təmsil edib. Forum çərçivəsində müxtəlif sessiyalar, ikitərəfli görüşlər və müzakirələrlə zəngin, məhsuldar bir həftə keçirdiyini vurğulayıb.
Abbas İbrahimovun sözlərinə görə, forumun ən yaddaqalan və qürurverici məqamlarından biri Azərbaycan Respublikasının Prezidenti İlham Əliyevin panel çıxışı olub. Prezidentin sülh gündəliyi və regionun gələcəyinə dair strateji baxışı aydın iqtisadi-siyasi vizyon formalaşdırıb.
Davos təəssüratları sırasında qlobal biznes və maliyyə gündəmi ilə bağlı bir sıra mühüm məqamlar da qeyd olunub. BlackRock şirkətinin baş icraçı direktoru Larry Finkin süni intellekt mövzusunda apardığı müsahibələrə toxunan İbrahimov, Jensen Huang, Elon Musk və Alex Karp kimi texnologiya liderlərinin fikirlərindən çıxan əsas nəticənin icra və idarəetmənin həlledici rol oynadığı olduğunu vurğulayıb.
O həmçinin JPMorgan Chasein baş icraçı direktoru Jamie Dimonun moderatorluğu ilə keçirilən, Böyük Britaniyanın maliyyə naziri Rachel Reevesin iştirak etdiyi qapalı debatdan da bəhs edib. Bu müzakirələrdə əsas nəticə kimi iqtisadi artımın tələbdən daha çox, uzunmüddətli kapitalın effektiv yerləşdirilməsindən asılı olduğu qeyd olunub.
Bundan əlavə, beyin sağlamlığı mövzusunda keçirilən sessiyalarda stress və zehni yorğunluğun məhsuldarlığa və qərarların keyfiyyətinə ölçüləbilən təsir göstərdiyi vurğulanıb və bu sahənin artıq iqtisadi amil kimi qiymətləndirildiyi bildirilib.
Sonda Abbas İbrahimov qeyd edib ki, Davosda keçirilən forum gələcək trendləri anlamaq və strateji baxışı dəqiqləşdirmək baxımından mühüm platformadır və Dünya İqtisadi Forumu – 2026-nın əsas mövzusu olan “Dialoq ruhu” gələcəyə doğru irəliləmək üçün vacib çağırışdır.
