AccessBank 2025-ci ilin ilk doqquz ayında faiz gəlirləri 21,753 min manat və ya 13.15% artıb ki, bu da əsasən müştərilərə verilən kreditlər üzrə gəlirlərin 21,412 min manat artması hesabına gerçəkləşmişdir. Lakin eyni zamanda faiz xərcləri 10,575 min manat və ya 16.95% artmış, xüsusilə cəlb edilmiş kreditlər üzrə xərclər 5,944 min manat və ya 55.34% artıb. Nəticədə xalis faiz gəliri 11,178 min manat və ya 10.85% yüksələrək 114,197 min manat təşkil edib.
Bankın qeyri-faiz gəlirləri 410 min manat və ya 3% azalma ilə 13,259 min manat, qeyri-faiz xərcləri isə 7,865 min manat və ya 12.12% artım ilə 72,774 min manat olmuşdur. Ən mühüm mənfi məqam mümkün zərərlər üçün ayrılan ehtiyatın 7,357 min manat və ya 175.8% artaraq 11,542 min manata çatması olub. Bütün bu amillər nəticəsində bankın xalis mənfəəti 5,832 min manat və ya 14,07% azalaraq 35,622 min manat təşkil etmişdir.
AccessBankın hesabat dövründə ümumi aktivləri 134,294 min manat və ya 9.04% artaraq 1,619,588 min manata çatmışdır. Bu artımın əsas hərəkətvericisi kredit portfelinin 137,247 min manat yaxud 12.45% böyüməsi olub. Xüsusilə istehlak kreditləri 41,165 min manat və ya 17.21%, biznes kreditləri isə 93,917 min manat və ya 10.41% artmışdır.
Öhdəliklər tərəfdə maraqlı vəziyyət müşahidə olunur: depozitlər cəmi 18,624 min manat yaxud 1.81% artarkən, digər maliyyə institutlarından öhdəliklər 80,615 min manat və ya 40.82% yəni əhəmiyyətli dərəcədə artmışdır. Kapital 36,980 min manat və ya 20.41% artımla 218,138 min manat olmuş, əsas artım mənbəyi bölüşdürülməmiş mənfəətin 35,621 min manat yaxud 74.05% yüksəlməsi olmuşdur.
AccessBank 2025-ci ilin 3-cü rübünün sonunda I dərəcəli kapitalı 169,851 min manat, tutulmalardan sonra isə 156,485 min manat təşkil etmişdir. Məcmu kapital 221,772 min manat olaraq qeydə alınmışdır. Riskə görə çəkilmiş aktivlər 1,347,648 min manat olmaqla, I dərəcəli kapitallıq nisbəti 11.61%, məcmu kapitallıq nisbəti isə 16.46% təşkil etmişdir ki, bu da normativ tələblərdən xeyli yüksək göstəricidir.
Bankın əməliyyat fəaliyyətindən pul axını kəskin mənfi dəyişikliyin müşahidə olunmasına gətirib çıxarmışdır.,2024-cü ilin ilk 3 rübünün sonuna olan 32,363 min manat müsbət göstəricidən 2025-ci ildə 33,777 min manat mənfi göstəriciyə enmişdir. Bu əsasən kredit portfelindəki sürətli artıma (143,600 min manat) sərf olunan vəsaitlə əlaqədardır. Nəticədə bankın nağd vəsait qalığı 51,745 min manat azalaraq 222,297 min manat olmuşdur.
AccessBank 2025-ci ilin ilk doqquz ayında qeyri-bərabər iqtisadi nəticələr əldə etmişdir. Güclü tərəflər arasında aktiv bazasının və kredit portfelinin artımı, xalis faiz gəlirinin yüksəlməsi və kapitalın möhkəmlənməsi qeyd olunur. Lakin mənfi cəhətlər kimi mənfəətin kəskin azalması, mənfi əməliyyat pul axını və maliyyələşdirmə mənbələrinin strukturundakı dəyişiklik (depozitlərdən digər maliyyə institutlarından vəsait cəlb etməyə keçid) diqqəti cəlb edir.
Bank aqressiv böyümə strategiyası həyata keçirir, lakin bu böyümə qısamüddətdə mənfəətlilik və likvidlik göstəricilərinə təzyiq göstərir. Gələcək dövrdə bank üçün əsas vəzifə böyümə tempi ilə mənfəətlilik arasında tarazlıq qurmaq və likvidlik vəziyyətini yaxşılaşdırmaq olacaq.