2024-cü ilin dekabr ayının 1-nə qədər sistemə ümumən 3 745 müraciət daxil olub ki, bunun 3 526-sı (94,15%) telekommunikasiya, 219-u (5,85%) isə poçt rabitəsi sahəsi ilə bağlıdır.
GDP xəbər verir ki, bu barədə İnformasiya Kommunikasiya Texnologiyaları Agentliyi (İKTA) məlumat yayımlayıb
Məlumata görə telekommunikasiya sahəsində 117 operator və provayderin şəxsi kabinetinə şikayətlər daxil olub. Şikayətlərin strukturunda sabit internet xidmətləri 66,28%, mobil rabitə 20,49%, telefon rabitəsi 10,31% və mobil internet 2,97% təşkil edib. Şikayətlərin xarakterinə görə, ən çox rast gəlinən problem sahələri “Xidmət keyfiyyəti ilə bağlı” (18,88%), “Xidmətin işləməməsi ilə bağlı” (17,28%) və “Əməkdaşlardan və ya xidmətdən narazılıq” (6,65%) olub.
Mobil rabitə kateqoriyasında ən çox “Operator dəyişdirmə (nömrədaşıma)” (6,52%), “Tariflərlə bağlı şikayət” (4,27%) və “Operator fəaliyyətindən narazılıq” (3,87%) müraciətləri qeydə alınıb. Telefon rabitəsi üzrə isə “Xidmətin işləməməsi” (4,54%), “Əməkdaşlardan narazılıq” (1,31%) və “İnfrastrukturla əlaqədar” (1,04%) problemlər ön plandadır.
Şikayətlərin coğrafi paylanması da diqqət çəkir. Belə ki, müraciətlərin 52,55%-i Bakı şəhərindən, 8,49%-i Abşeron-Xırdalandan, 4,75%-i Sumqayıtdan, qalan 2,22%-i isə Lənkəran və Gəncədən olub. Bu 5 ərazi vahidi ümumi şikayətlərin 70,23%-ini təşkil edir.
Poçt rabitəsi operatorları ilə bağlı 219 müraciətdən 62,56%-i sürətli poçt xidmətləri, 37,44%-i universal poçt rabitəsi ilə əlaqədar olub. Maraqlıdır ki, ümumi şikayətlərin 82,78%-i kişilər, 17,22%-i qadınlar tərəfindən verilib. Telekommunikasiya sahəsində bu nisbət daha kəskin olub – 84,69% kişi, 15,31% qadın. Poçt rabitəsi sahəsində isə müraciətlərin gender nisbəti daha tarazlı – 52,05% kişi, 47,95% qadın.
Sistemin getdikcə daha da təkmilləşdirilməsi və genişləndirilməsi, eləcə də operator və provayderlər üçün təlimlərin keçirilməsi vətəndaşların şikayətlərinin operativ həlli üçün əhəmiyyətli addımlardır.