İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti 2024-cü ilin yanvar-sentyabr ayları ərzində istehlakçı hüquqlarının müdafiəsi və istehlak bazarına nəzarət sahəsində daxil olan müraciətlərlə bağlı statistikanı açıqlayıb.
GDP xəbər verir ki, Dövlət Xidmətinin məlumatına görə, 9 ay ərzində quruma ümumilikdə 5597 müraciət daxil olub. Müraciətlərin təhlili göstərir ki, vətəndaşları ən çox narahat edən məsələlər qeyri-qida məhsulları ilə bağlı olub.
Müraciətlərin kateqoriyalar üzrə bölgüsü aşağıdakı kimidir:
- Qeyri-qida məhsulları – 2868 müraciət
- Xidmət sahəsi – 2291 müraciət
- Qida məhsulları – 275 müraciət
- Dərman vasitələri və tibbi avadanlıqlar – 99 müraciət
- Digər məsələlər – 64 müraciət
Qeyri-qida məhsulları üzrə müraciətlərin ətraflı təhlili göstərir ki, ən çox şikayətlər məişət əşyaları və texnikası (697), digər qeyri-ərzaq malları (586), mobil telefonlar (433) və geyim malları (389) ilə bağlı olub.
Xidmət sahəsində isə ən çox müraciətlər karqo-daşıma-çatdırılma (843), rabitə və internet (227), restoran (130) və turizm (115) xidmətləri ilə əlaqədar qeydə alınıb.
Qida məhsulları kateqoriyasında ərzaq məhsulları ilə bağlı 249, spirtli içkilərlə bağlı 14, sərinləşdirici içkilər və su ilə bağlı isə 12 müraciət daxil olub.
Dövlət Xidməti bildirib ki, istehlakçıların hüquqlarının etibarlı müdafiəsini təmin etmək istiqamətində tədbirlər davam etdirilir. Qurum müraciətlərin hər birinin diqqətlə araşdırıldığını və qanunvericiliyin tələblərinə uyğun tədbirlərin görüldüyünü qeyd edib.
Xatırladaq ki, vətəndaşlar istehlakçı hüquqlarının pozulması ilə bağlı Antiinhisar və İstehlak Bazarına Nəzarət Dövlət Xidmətinə birbaşa müraciət edə bilərlər. Bu müraciətlər əsasında müvafiq yoxlamalar aparılır və aşkar edilən pozuntularla bağlı qanunvericiliyə uyğun tədbirlər görülür.