Azərbaycan Mərkəzi Bankı (AMB) maliyyə innovasiyalarının tətbiqini sürətləndirmək məqsədilə Xüsusi Tənzimləmə Rejimində (sandbox) əhəmiyyətli yeniliklər həyata keçirir.
AMB-nin sədr müavini Vüsal Xəlilov Bakıda keçirilən IX Beynəlxalq Bankçılıq Forumunda etdiyi çıxışında bildirib ki, hazırda I qəbul mərhələsi üzrə 2 iştirakçının sınaq müddəti uzadılıb, II qəbul dövrü üzrə isə bir neçə layihənin yaxın günlərdə sınaq mühitinə qəbul ediləcəyi gözlənilir.Xəlilov açıdı ki, innovativ məhsulların tənzimləmə mühitinə daha çevik inteqrasiyasını təmin etmək üçün “Pre-Sandbox” modeli hazırlanır. Həmçinin, xüsusi tənzimləmə rejiminə müraciətlərin davamlı açıq müraciət modeli əsasında qəbulu üçün işlər yekun mərhələdədir.
“Bu yanaşma gələcəkdə maliyyə innovasiyalarının sınaq mühitinə daha çevik və fasiləsiz şəkildə qəbulunu təmin edəcək” – deyə Xəlilov qeyd edib.
Forumun ikinci günündə kibertəhlükəsizliyə həsr olunmuş panel çərçivəsində çıxış edən sədrin müavini bildirib ki, FinCERT-in fəaliyyəti hazırda formalaşma və inkişaf mərhələsindədir.
“Komandanın genişlənməsi və yeni mütəxəssislərin qoşulması ilə imkanlar artır, maliyyə bazarı iştirakçıları və digər sektorial CERT-lərlə kommunikasiya kanalları qurulur” – deyə Xəlilov vurğulayıb.
O qeyd etdi ki, bu proses kibertəhlükəsizlik sahəsində koordinasiyanın gücləndirilməsinə, informasiya mübadiləsinin səmərəli təşkilinə və mövcud kibertəhdidlərin operativ təhlilinə imkan yaradır.
Mərkəzi Bankın informasiya təhlükəsizliyi standartlarının yenilənməsi, rəqəmsal əməliyyat davamlılığı üzrə tələblərin gücləndirilməsi istiqamətində kompleks tədbirlər həyata keçirdiyini bildirən Xəlilov, kibertəhlükəsizliyin bank sektoru üçün prioritet əhəmiyyət kəsb etdiyini təsdiqləyib.