2025-ci ilin yanvar-iyul aylarında ölkədə ümumi daxili məhsul (ÜDM) 72.429,9 milyon manat olaraq qeydə alınmışdır. Bu, 2024-cü ilin eyni dövründəki 70.544,0 milyon manatlıq ÜDM ilə müqayisədə 1.885,9 milyon manat və ya 0,9% artım deməkdir.
GDP Dövlət Statistika Komitəsinə istinadla xəbər verir ki,iqtisadiyyatın sektorlarına nəzər yetirdikdə: neft-qaz sektorunda əlavə dəyər 2024-cü ilə nisbətən 3,3% azalma, əksinə qeyri-neft-qaz sektorunda isə 3,1% artım qeydə alınmışdır.
ÜDM-in struktur paylarında əhəmiyyətli dəyişikliklər müşahidə olunur. Sənayenin ÜDM-dəki payı 38,4%-dən 35,0%-ə enərək 3,4 bənd azalmış, digər tərəfdən “digər sahələr” kateqoriyasının payı 19,1%-dən 21,1%-ə qalxaraq 2,0 bənd artmışdır.
Digər sahələrdə: ticarət və nəqliyyat vasitələrinin təmiri 9,6%-dən 10,1%-ə (+0,5 bənd), kənd təsərrüfatı, meşə və balıqçılıq 6,0%-dən 6,3%-ə (+0,3 bənd), tikinti 5,7%-dən 6,0%-ə (+0,3 bənd), turizm və ictimai iaşə isə 2,4%-dən 2,8%-ə (+0,4 bənd) yüksəlmişdir. Nəqliyyat-anbar (7,0%) və informasiya-rabitə (1,8%) payları dəyişməz qalarkən, məhsul idxal vergilərinin ÜDM-dəki payı 10,0%-dən 9,9%-ə cüzi azalıb
Əhalinin rifah göstəricisi olan adambaşına düşən ÜDM 2024-cü ildə 6.921,4 manat ikən, 2025-ci ildə 7.076,9 manata çatmışdır. Bu, bir il ərzində 155,5 manat və ya 2,25% artım deməkdir. Ümumiyyətlə, 2025-ci ilin ilk yeddi ayında iqtisadiyyatda neft-qaz sektorunun tənzimləyici rolu azalma istiqamətində təsir göstərsə də, qeyri-neft sektorları və xidmət sahələrindəki müsbət dinamika ÜDM artımının müsbət qalmasına şərait yaratmışdır.
