Gürcüstan Respublikasının Milli Bankının (GMB) nümayəndə heyəti Azərbaycan Respublikasının Mərkəzi Bankına (AMB) səfər edib.
GDP xəbər verir ki, səfər ikitərəfli texniki əməkdaşlıq çərçivəsində təşkil olunub və əsas məqsəd maliyyə sahəsində tənzimləyici qurumlar arasında peşəkar dialoqun gücləndirilməsi olub.
Görüş zamanı GMB nümayəndələri beynəlxalq maliyyə təşkilatları tərəfindən buraxılan istiqrazların qeydiyyatı və emissiyasının tənzimlənməsi, qiymətli kağızların ticarəti, depozitar və ticarətsonrası sistemin fəaliyyəti üzrə təcrübələrini bölüşüblər. Bundan əlavə, beynəlxalq maliyyə təşkilatlarının yerli valyutada buraxdıqları istiqrazların daxili maliyyə bazarları üçün potensial əhəmiyyəti barədə müzakirələr aparılıb.
Qeyd edək ki, səfər cari ilin mart ayında AMB və GMB arasında imzalanmış Anlaşma Memorandumu çərçivəsində baş tutub. Memorandum pul siyasəti, maliyyə sabitliyi, bank nəzarəti, ödəniş sistemləri və maliyyə texnologiyaları sahələrində əməkdaşlığın genişləndirilməsini nəzərdə tutur. Sənədə əsasən, təcrübə və məlumat mübadiləsi, birgə seminarlar, təlimlər, texniki məsləhətləşmələr, eləcə də araşdırma xarakterli səfərlərin təşkili planlaşdırılır.