2025-ci ilin ilk yeddi ayında sığorta şirkətləri tərəfindən toplanan ümumi sığorta haqlarının məbləği 937,658 min manat təşkil edib ki, bu da 2024-cü ilin eyni dövründəki 833,199 min manatlıq göstərici ilə müqayisədə 104,459 min manat və ya 12.54% artım deməkdir.
GDP xəbər verir ki,bu artım bazarın ümumi ölçüsünün 834 milyon manatdan 938 milyon manata yüksəlməsi ilə nəticələnib.
Eyni zamanda, sığorta ödənişlərində də kəskin artım müşahidə olunub. 2025-ci ilin yanvar-iyul aylarında sığortaçılar tərəfindən həyata keçirilən ümumi ödənişlər 529,307 min manat olub, bu isə 2024-cü ilin 438,618 min manatlıq göstəricisindən 90,689 min manat və ya 20.67% çoxdur. Ödənişlərin artım tempinin toplanan haqların artım tempindən əhəmiyyətli dərəcədə yüksək olması bazarın risk profilinin dəyişdiyini aydın şəkildə göstərir.
Bu dinamika sığorta bazarının zərərlilik nisbətinə birbaşa təsir göstərib. 2025-ci ilin ilk 7 ayında zərərlilik nisbəti 56.45% təşkil edib, yəni toplanan hər 100 manat sığorta haqqından 56.45 manat ödəniş kimi geri qaytarılıb. Bu göstərici 2024-cü ilin eyni dövründəki 52.63%-lik səviyyə ilə müqayisədə 3.82 faiz bəndi artımın göstəricisidir. Bu, bir ildə ərzində bazarda baş vermiş daha çox sayda sığorta hadisəsini, böyük ölçülü zərərlərin ödənilməsini və ya ümumi sığorta öhdəliklərinin artmasını göstərən mühüm amildir.
Müəllif: Aynur Qəniyeva