2025-ci ilin aprel ayında rezident maliyyə institutlarının emissiya etdiyi ödəniş kartları vasitəsilə aparılan əməliyyatların sayı 223 milyon 187 min ədədə, əməliyyatların həcmi isə 13 milyard 689 milyon manatadək artaraq 2024-cü ilin aprel ayı ilə müqayisədə əməliyyatların sayını 53,5%, əməliyyatların həcmini isə 41,1% yüksəldib.
GDP Azərbaycan Mərkəzi Bankına istinadən xəbər verir ki, bu əməliyyatlarda Visa kartları lider olaraq 137 milyon 613 min ədəd əməliyyatın 61,7% -ni və 7 milyard 957 milyon manat əməliyyat həcminin 58,1% -ni təşkil edib. Visa-nın əməliyyat sayı əvvəlki ilin eyni dövrünə nisbətən 43,2%, əməliyyat həcmi isə 34,4% artmasına baxmayaraq, bazar payında əməliyyat sayında 4,4% azalma müşahidə olunub.
MasterCard kartları isə əməliyyatların sayını 78,7%, əməliyyat həcmini isə 52,9% artıraraq 85 milyon 492 min ədəd əməliyyatın 38,3% -ni və 5 milyard 660 milyon manat əməliyyat həcminin 41,4% -ni təmin edib. Bu, MasterCard-un əməliyyat sayında bazar payını 5,4% artırması ilə nəticələnib.
Digər kart sistemlərindən American Express əməliyyat sayını 37,9%, əməliyyat həcmini 83% artıraraq kiçik paya sahib olsa da, ümumi bazar payında dəyişikliklər minimal olub. UnionPay əməliyyat sayı 50% azalsa da, həcmi cüzi artıb. Lokal kartların əməliyyat sayı və həcmi müvafiq olaraq 62,9% və 62% artıb.
Qeyri-rezident maliyyə institutlarının emissiya etdiyi ödəniş kartları ilə aparılan əməliyyatların sayı 27,1%, əməliyyat həcmi isə 23,4% artaraq müvafiq olaraq 1 milyon 403 min ədədə və 141 milyon manata çatıb.
Bu seqmentdə Visa kartları əməliyyat sayını 37,5%, həcmini isə 33,2% artıraraq 926 min əməliyyatla 66% -lik, 86 milyon manat əməliyyat həcmi ilə isə 61,4% bazar payına sahib olub. MasterCard kartları əməliyyat sayını 8,7%, həcmini 4,9% artırsa da, əməliyyat sayı üzrə bazar payı 6,6% azalıb. Digər sistemlər arasında UnionPay əməliyyat sayı 55% azalsa da, digərlərinin əməliyyat sayı və həcmi əhəmiyyətli artıb.
Ümumilikdə, 2025-ci ilin ilk dörd ayında ödəniş kartları vasitəsilə aparılan əməliyyatların sayı və həcmi həm rezident, həm də qeyri-rezident institutlar üzrə ötən ilin müvafiq dövrü ilə müqayisədə əhəmiyyətli dərəcədə artıb.