Azərbaycanın xariclə ticarət balansında uzun müddətli fasilədən sonra aylıq böyük defisit yaranıb.
GDP Dövlət Gömrük Komitəsinə istinadən xəbər verir ki, sentyabr ayında 1 mlrd. 623.15 mln. dollar ixrac olduğu halda, 1 mlrd. 879 mln. dollar həcmində idxal olub.
İdxalın ixracı üstələməsi nəticəsində ticarət balansında 255.86 mln. dollar defisit (mənfi saldo) yaranıb.
Uzun müddət idi ki, ölkənin ticarət balansı qalıqla tamamlanırdı. Neft qiymətlərinin yüksəlməsi ilə paralel təbii qaz ixracının artması ixracın güclü artımını təmin etmişdi.
İxracın düşməsinə başlıca təsir edən amil neft və qazın həm qiymətlərdəki performansı, həm də ixrac həcminin düşməsindən irəli gəlir. Cari ilin ilk üç rübündə ölkə xaricə yalnız 17.61 mln. tonluq xam neft sata bilib. Keçən illə müqayisədə bu düz 11 faiz üzərində enişdir. İxrac neftinin ümumi dəyəri 11 mlrd. dollar təşkil edib ki, bu da keçənilki 12.13 mlrd. dollardan aşağıdır.
