2026-cı ilin yanvar-fevral aylarında Azərbaycan sığorta bazarında həyat sığortası seqmenti artım tempini qoruyaraq könüllü sığorta bazarının əsas hərəkətverici qüvvəsi olaraq çıxış edib.
GDP xəbər verir ki, həyat sığortası üzrə yığımlar 110.090 min manatdan 118.308 min manata yüksələrək 8.218 min manat və ya 7,5% artıb. Daha çox diqqəti cəlb edən dinamika isə ödənişlərdə qeydə alınıb – bu göstərici 69.794 min manatdan 100.751 min manata qalxaraq 30.957 min manat və ya 44,4% artıb. Bu isə bazarda həm aktivliyin artdığını, həm də əvvəlki illərdə bağlanmış uzunmüddətli müqavilələr üzrə ödəniş mərhələsinin intensivləşdiyini göstərir.
Məlumata görə, həyat sığortasının əsas hissəsini təşkil edən yaşam sığortası yarımsinfi də artım trendini davam etdirib. Bu istiqamət üzrə haqlar 103.640 min manatdan 109.892 min manata yüksələrək 6.252 min manat və ya 6,0% artıb. Ödənişlər isə daha sürətli artaraq 68.922 min manatdan 30.750 min manat və ya 44,6% artaraq 99.672 min manata çatıb. Bu dinamikanı əsasən bank sektoru ilə inteqrasiyanın dərinləşməsi, ipoteka kreditlərinin çoxalması və əmanət tipli uzunmüddətli sığorta məhsullarına marağın artması ilə əlaqəli ola bilər.
Həyatın ölüm halından sığortası seqmentində də nəzərəçarpacaq artım müşahidə olunub. Bu yarımsinif üzrə haqlar 5.288 min manatdan 6.612 min manata yüksələrək 25% artıb. Ödənişlər isə 502 min manatdan 721 min manata çataraq 43,6% artım göstərib. Bu göstəricilər həm yeni müqavilələrin sayının artdığını, həm də sığorta hadisələrinin daha çox baş verdiyini əks etdirir.
Əmək qabiliyyətinin itirilməsi üzrə sığorta sinfində yığımlar kəskin 47.1% artaraq 573 min manatdan 843 min manata yüksəlib. Bununla belə, ödənişlər 80 min manatdan 15 min manata düşərək 81,3% azalıb. Bu hal bazara yeni daxil olmuş müqavilələrin hələ ödəniş mərhələsinə çatmaması və ya sığorta hadisələrinin azalması ilə əlaqələndirilə bilər.
Sağalmaz xəstəliklərdən sığorta isə ən sürətli böyüyən istiqamətlərdən biri kimi diqqət çəkir. Bu sahədə haqlar 588 min manatdan 961 min manata yüksələrək 63,4% artıb. Ödənişlər də artaraq 290 min manatdan 18.6% artaraq 344 min manata çatıb. Bu artımı əhalinin sağlamlıq risklərinə qarşı daha həssas yanaşması, fərdi maliyyə planlaşdırmasının güclənməsi və tibbi maarifləndirmənin artması ilə əlaqələndirilə bilər.
Ümumilikdə, 2026-cı ilin ilk iki ayının nəticələri göstərir ki, həyat sığortası bazarı həm həcminə, həm də funksional roluna görə böyüməkdə davam edir və maliyyə sektorunda uzunmüddətli yığım və sosial təminat aləti kimi əhəmiyyətini daha da artırır.
Müəllif: Aynur Qəniyeva