Biznes kreditlərinin faiz dərəcələrində nəzərəçarpan artım baş verməyib
GDP xəbər verir ki, bunu PAŞA Bank ASC-in İdarə Heyəti sədrinin müavini Bəhruz Nağıyev, bankın 2024-cü ilin birinci yarısının maliyyə nəticələrinə həsr olunmuş mətbuat konfransında, Mərkəzi Bankın uçot-faiz dərəcəsinin bazara dolayı təsiri haqqında danışıb. Onun sözlərinə görə, uçot-faiz dərəcəsinin endirilməsi və ya artırılması qiymətli kağızlar bazarına birbaşa təsir edir və bu da investorlar arasında müəyyən gözləntilər yaradır.
Nağıyev bildirib ki, ölkənin suveren kağızlarının gəlirliyi 7-8% civarındadır və bu vəziyyətdə fiziki şəxslər öz depozitlərini həmin səviyyədə və ya ondan bir qədər yüksək gözləntilərlə banklara yerləşdirməyi düşünürlər. Bu proses isə pulların maya dəyərinə təsir edir və həm pərakəndə, həm də biznes kreditlərinə öz təsirini göstərir. O qeyd edib ki, pərakəndə bankçılıqda bu təsiri daha çox görmək mümkündür.
Mərkəzi bankın faiz qərarlarının biznes kreditlərinin faiz dərəcəsinə təsirini aydınlaşdıran Bəhruz Nağıyev bankların reklamlarında rəqəmsal kreditlərin 12% və ya 10.9% ətrafında təklif olunduğunu vurğulayıb. O əlavə edib ki, PAŞA Bank son dövrlərdə kiçik və orta sahibkarlara 10%-lik kreditlər təklif edir. Halbuki, əvvəllər biznes kreditlərinin faizləri ən azı 17-18%-dən başlayırdı.
Nağıyev qeyd edib ki, bununla belə, bank faiz dərəcələrini nəzərəçarpan dərəcədə artırmayıb, xüsusilə də biznes kreditlərində bu artım müşahidə olunmayıb. O, həmçinin əlavə edib ki, yalnız PAŞA Bank yox, bazardakı digər bankların da biznes kreditləri üzrə faiz dərəcələrində ciddi artım qeydə alınmayıb.