Mərkəzi Bankın 2024-2026-cı illər üçün strategiyası maliyyə inklüzivliyini artırmaq, maliyyə alətlərini diversifikasiya etmək və kapital bazarlarının qeyri-neft ÜDM-ə töhfəsini 10%-dən 14%-ə çatdırmaq məqsədi daşıyır. GDP xəbər verir ki, bu “Bakı Fond Birjasının 2024-cü ilin III rübü Azərbaycan Kapital Bazarına dair Bülleten”ində qeyd edilib.
Bülleten bildirilir ki, Azərbaycanda maliyyə sektorunda sağlam artım və sabitlik müşahidə olunur. Sentyabr 2024-cü il vəziyyətinə görə, ölkənin maliyyə sektoru əlverişli iqtisadi şərait və tənzimləyici islahatlar sayəsində davamlı inkişaf edir. «Bank sektorunda xalis mənfəət 6,6% artaraq təxminən 454 milyon dollara çatıb, əməliyyat gəlirləri isə 19,2% artaraq 2,199 milyard dollara yüksəlib. Bankların cəmi aktivləri 9,3% artaraq 29,123 milyard dollara çatıb və 2024-cü ildə kreditlərin 20% artması gözlənilir. Ticarət, sənaye, informasiya və rabitə sahələrində güclü artım müşahidə olunur»,-deyə Bakı Fond Birjasının təqdim etdiyi «Azərbaycan Kapital Bazarına dair Bülleten”ində ölkənin bank sektoru barədə bildilir.
Bülletendə həmçinin manatın dollara qarşı məzənnəsinin sabitliyi və sektorun kredit portfelinin dollarlaşmanın səviyyəsinə toxunulub manatın ABŞ dollarına qarşı məzənnəsi ardıcıl səkkizinci ildir ki, sabit qalıb, kreditlərdə dollarlaşma tarixi minimuma – 18%-ə enmişdir. Mərkəzi Bank əlverişli kredit mühitini və maliyyə inklüzivliyini yaxşılaşdıraraq uçot dərəcəsini 7,25%-ə endirmişdir.
Qeyd edilib ki, sığorta sektoru da 5% artaraq 1,129 milyard dollarlıq həcmə çatıb. Gələcəyə nəzər salsaq, Mərkəzi Bankın 2024-2026-cı illər üçün strategiyası maliyyə inklüzivliyini artırmaq, maliyyə alətlərini diversifikasiya etmək və kapital bazarlarının qeyri-neft ÜDM-ə töhfəsini 10%-dən 14%-ə çatdırmaq məqsədi daşıyır.Bütövlükdə, Azərbaycanın maliyyə sektoru davamlı inkişaf və dayanıqlılıq üçün yaxşı mövqedədir.
