Bakıda “Naxçıvan Muxtar Respublikasının iqtisadi potensialı, vergi, gömrük və sosial sığorta güzəştləri” mövzusunda tədbir keçirilib.
GDP xəbər verir ki, məqsəd 2026-cı il yanvarın 1-dən Naxçıvanda tətbiq olunan güzəştlər barədə sahibkarların məlumatlandırılması və regionun investisiya imkanlarının tanıdılması olub.
Tədbirdə iqtisadiyyat nazirinin müavini Azər Bayramov son illərdə aparılan islahatlar nəticəsində qeyri-neft sektorunun inkişaf etdiyini, fiskal dayanıqlığın gücləndiyini və strateji valyuta ehtiyatlarının 85 milyard ABŞ dollarını ötdüyünü bildirib. Qeyd olunub ki, Naxçıvanda sahibkarlığın dəstəklənməsi məqsədilə vergi güzəştləri 10 il müddətinə tətbiq edilir.
Naxçıvan Muxtar Respublikasının iqtisadiyyat naziri Kazım Hüseynəliyev regionun sənaye, logistika və ixrac imkanlarının genişləndiyini, Türkiyə ilə quru sərhədinin Naxçıvan üçün mühüm üstünlük yaratdığını vurğulayıb.
Dövlət Vergi Xidmətinin rəis müavini Emil Qarayev isə 2025-ci ildə Naxçıvanda büdcəyə vergi daxilolmalarının 260 milyon manatdan çox olduğunu, daxilolmaların böyük hissəsinin qeyri-dövlət sektorunun payına düşdüyünü bildirib. Qeyd edilib ki, 2026-cı ildən tətbiq olunan 10 illik vergi güzəştləri investisiyaların stimullaşdırılmasına xidmət edir.
Tədbir çərçivəsində vergi, gömrük və sosial sığorta güzəştləri ilə bağlı təqdimatlar keçirilib və sahibkarların sualları cavablandırılıb.
