Mingəçevirdə yerləşən və ölkənin enerji təhlükəsizliyi baxımından strateji əhəmiyyət daşıyan “8 Noyabr” Elektrik Stansiyasının açılış mərasimi keçirilib.
GDP xəbər verir ki, tədbirdə iştirak edən Kapital Bank-ın İdarə Heyətinin sədri və Baş İcraçı Direktoru Fərid Hüseynov, bu mühüm layihədə iştirak etməyin bank üçün xüsusi əhəmiyyət kəsb etdiyini vurğulayıb.
Fərid Hüseynov bildirib:
“Mingəçevirdə istifadəyə verilən ‘8 Noyabr’ Elektrik Stansiyasının açılış mərasimində iştirak etmək bizim üçün böyük əhəmiyyət daşıyır. Kapital Bank olaraq ölkəmizin enerji təhlükəsizliyinə və iqtisadi inkişafına mühüm töhfə verəcək Azərbaycan İstilik Elektrik Stansiyasının modernizasiya layihəsinin maliyyə tərəfdaşlarından biri olmaqdan qürur duyuruq.”
Bank rəhbəri qeyd edib ki, həyata keçirilən bu modernizasiya təşəbbüsü yalnız enerji səmərəliliyinin artırılması ilə kifayətlənmir, həmçinin ətraf mühitin mühafizəsi, karbon emissiyalarının azaldılması və regionun enerji təhlükəsizliyinin təmin olunması baxımından da xüsusi əhəmiyyət kəsb edir.
“Bununla da ölkəmiz Paris Konvensiyası çərçivəsində götürdüyü öhdəliklərə, o cümlədən 2,1 milyon tondan çox karbon emissiyalarının azaldılması məqsədinə ciddi töhfə verəcək,” – deyə o əlavə edib.
Kapital Bank rəhbərinin sözlərinə görə, bankın belə layihələrdə iştirakı yalnız maliyyə təminatı ilə məhdudlaşmır. Kapital Bank uzunmüddətli inkişaf strategiyalarını dəstəkləyən, dəyər yaradan və dayanıqlı həllərə töhfə verən maliyyə institutu kimi fəaliyyətini davam etdirir.
“Enerji, infrastruktur və ətraf mühit sahəsindəki bu kimi təşəbbüslər dayanıqlı bankçılıq baxışımızın da ayrılmaz hissəsidir. Əminəm ki, istifadəyə verilən bu elektrik stansiyası ölkəmizin iqtisadi inkişafını və enerji təhlükəsizliyini daha da möhkəmləndirəcək,” – deyə Fərid Hüseynov fikrini yekunlaşdırıb.
Qeyd edək ki, “8 Noyabr” Elektrik Stansiyası Azərbaycanın enerji sistemində müasir texnologiyalara əsaslanan mühüm layihədir və regionda enerji sabitliyinin gücləndirilməsi məqsədi daşıyır.