IX Beynəlxalq Bankçılıq Forumunda çıxış edən Bank Respublika ASC-nin İnformasiya Təhlükəsizliyi Departamentinin direktoru Xətai Gəncəliyev sektorda mərkəzləşdirilmiş anti-fraud sisteminin tətbiqi ilə bağlı mövcud vəziyyət və qarşıda duran çətinliklərdən danışıb.
GDP -nin məlumatına görə, Xətai Gəncəliyev bildirib ki, digər banklar kimi Bank Respublika da mərhələli şəkildə mərkəzləşdirilmiş fırıldaqçılıqla mübarizə sisteminə keçid prosesini həyata keçirir. Lakin bu istiqamətdə bir sıra mövcud və potensial çətinliklər mövcuddur.
Onun sözlərinə görə, ən əsas problemlərdən biri bulud həllərinə dair mövcud məhdudiyyətlərlə bağlıdır. Birinci və əsas çətinlik kimi bulud həllərinə qoyulan məhdudiyyətlər göstərildi. Direktor bildirdi ki, bazarda mövcud olan əsas təchizatçılar (vendorlar) demək olar ki, yalnız bulud əsaslı həllər təqdim edir, şirkət daxilində quraşdırıla bilən (on-premise) həllər isə təklif olunmur. Bu da bankın seçim imkanlarını məhdudlaşdırır:
“Bizim əsas çətinliklərimizdən biri bulud həllərindən istifadə ilə bağlı məhdudiyyətlərdir. Böyük vendorlar həllərini əsasən bulud üzərindən təqdim edirlər və on-premise variantlar demək olar ki, yoxdur. Bu isə bizim seçim imkanlarımızı azaldır. Bu baxımdan gözləntimiz odur ki, daxili bulud provayderləri bazardakı əsas vendorlarla əməkdaşlıq etsin. Çünki bunun vasitəsilə biz məlumatları ölkə xaricinə çıxarmayacağıq.”
Bank rəsmisi digər mühüm məsələnin kadr çatışmazlığı olduğunu vurğulayıb. Son illər informasiya təhlükəsizliyi üzrə mütəxəssislərin sayında artım olsa da, məhz fırıldaqçılıqla mübarizə sahəsində peşəkarların çatışmazlığı banklar üçün çətinlik yaradır:
“Bu istiqamətdə həm maraqlı tərəflərdən, həm də Azərbaycan Banklar Assosiasiyası (ABA) və tənzimləyicidən təhsil və tədris proqramlarının təşkili ilə bağlı dəstək gözləyirik.”
Gəncəliyev əlavə edib ki, bəzi bankların özünə məxsus prosessinq mərkəzlərinin olmaması inteqrasiya problemlərinə səbəb olur:
“Anti-fraud sistemlərinin tətbiqi zamanı prosessinq mərkəzləri ilə inteqrasiya çətinlikləri yarana bilər. Bu səbəbdən tənzimləyicidən standartların və qaydaların müəyyənləşdirilərək API və digər interfeyslərin istifadəsini asanlaşdıracaq mexanizmlərin yaradılmasını gözləyirik.”
Çıxışının sonunda Bank Respublika rəsmisi qeyd edib ki, mərkəzləşdirilmiş anti-fraud sisteminə keçid bank sektorunda təhlükəsizliyin daha yüksək səviyyədə təmin olunması baxımından vacib addımdır və bu istiqamətdə bütün maraqlı tərəflərlə əməkdaşlıq prioritet olaraq qalır.
Müəllif: Aynur Qəniyeva