Azərbaycan bank sektoru 2025-ci ilin ilk yeddi ayında əvvəlki ilin eyni dövrü ilə müqayisədə gəlir tərəfində güclü artım qeyd etsə də, xərclərin daha sürətli artması səbəbindən xalis mənfəət səviyyəsini sabit saxlamışdır.
Əsas Gəlir Mənbələrində Artım: Sektorun ümumi faiz gəlirləri 511.7 milyon manat və ya 22.2% artaraq 2,814.1 milyon manat olmuşdur. Bu artımın əsas hərəkətverici qüvvəsi kreditlərdən əldə edilən faiz gəliri olmuşdur ki, bu da 438.3 milyon manat və ya 24.7% artımla 2,212.8 milyon manata çatmışdır. Eyni zamanda, qeyri-faiz gəlirlərin də 135.0 milyon manat və ya 14.4% artım olub. .
Xərclərdəki Kəskin Yüksəliş: Bununla belə, gəlirlərdəki bu artım, faiz xərclərinin daha da yüksək tempdə artması ilə müşayiət olunmuşdur. Bankların depozit və digər mənbələrə ödədiyi faiz xərcləri 359.9 milyon manat və 54.5% artaraq 1,020.5 milyon manat təşkil etmişdir. Xüsusən də, depozitlər üzrə faiz xərcləri 229.8 milyon manat və ya 47.1% artmışdır. Bundan əlavə, banklar riski idarə etmək məqsədilə aktivlər üzrə itki ehtiyatlarına 55.9 milyon manat və ya 30.7% daha çox vəsait ayırmışlar.
Nəticədə, artan gəlirlər daha sürətli artan xərclər, o cümlədən faiz xərcləri və risk ayırmaları tərəfindən udulmuşdur. Beləliklə, sektorun vergidən əvvəlki mənfəəti cəmi 12.3 milyon manat və ya 1.5% artmış, lakin bütün bu dəyişikliklərdən sonra xalis mənfəət dəyişməyərək 682.8 milyon manat səviyyəsində qalmışdır
Müəllif:Aynur Qəniyeva