Beynəlxalq Valyuta Fondu (BVF) Azərbaycan barədə yeni hesabatında ölkədə inflyasiya dinamikasını qiymətləndirib.
GDP xəbər verir ki, inflyasiya 2022-ci ildə pik həddə çatdıqdan sonra 2023-cü ildə yumşalmaqla dekabr ayında 2,1% səviyyəsində qeydə alınıb.
2024-cü ilin aprelində inflyasiya təxminən sıfıra yaxın dəyər göstərsə də, ilin ikinci yarısında artım tendensiyası müşahidə olunub. Belə ki, dekabr ayında inflyasiya 4,9%-ə qalxıb, lakin bu göstərici Azərbaycan Mərkəzi Bankının (AMB) 4±2% hədəf diapazonu daxilində qalıb.
BVF hesabatında qeyd olunur ki, inflyasiyanın son aylarda artması qismən enerji, nəqliyyat və kommunal xidmətlər kimi tənzimlənən qiymətlərdə birdəfəlik düzəlişlərlə bağlıdır. Eyni zamanda, əsas inflyasiya (qida və enerji xaric) 2023-cü ilin dekabrındakı 2,3%-dən 2024-cü ilin sonunda 4,4%-ə yüksəlib.
İnflyasiyanın hədəf diapazonu daxilində qalmasını saxlanılmasını AMB-nin uğuru kimi qiymətləndirmək olar. Bununla yanaşı, enerji və digər tənzimlənən sahələrdə qiymət dəyişiklikləri gələcək aylarda inflyasiya dinamikasına təsir göstərməyə davam edə bilər.