Keçən həftə PASHA Holding, məşhur İtalyan brendi Bvlgari-nin nümayəndə heyətini Bakıda qəbul edib. Dünya şöhrətli zərgərlik evinin Roma baş ofisindən Azərbaycana təşkil edilən bu ilk səfər, Blue Planet komandasının dəvəti ilə baş tutub.
Səfər proqramı çərçivəsində qonaqlar Heydər Əliyev Mərkəzində təşkil olunan yüksək zərgərlik üzrə “Opera Qalası”nda iştirak ediblər. Tədbir Bvlgari-nin Azərbaycan bazarındakı mövqelərinin möhkəmlənməsini bir daha nümayiş etdirib.
Nümayəndə heyəti eyni zamanda PASHA Holding-in ofisində rəhbərliklə görüş keçirib. Görüşdə Avropa üzrə Baş Direktor Benjamin Beaufils, İtaliya və Türkiyə üzrə Baş Direktor Renato Munafó; PASHA Holding-in Baş İcraçı Direktoru Cəlal Qasımov, Blue Planet Distribution-un Baş İcraçı Direktoru Mehriban Axundova, PASHA Real Estate Group-un Baş Kommersiya Direktoru Elçin Qədimov və Ventures Group-un İcraçı Direktoru Elnur Əmikişiyev iştirak ediblər.
Tərəflər arasında təxminən iyirmi ildir davam edən uğurlu əməkdaşlıq, gələcək birgə layihələr və inkişaf perspektivləri müzakirə olunub. Görüşdə həmçinin PASHA Holding-in cari və planlaşdırılan təşəbbüsləri, eləcə də regional bazarın ümumi vəziyyəti barədə fikir mübadiləsi aparılıb.
