“PAŞA Bank” ASC-nin İdarə Heyətinin sədri Cavid Quliyev 2024-cü ilin yekunlarına həsr olunan mətbuat konfransında bildirib ki, Azərbaycan iqtisadiyyatı öz inkişafını sabit şəkildə davam etdirib və ötən il ərzində ÜDM 4,1% artaraq 126 milyard manata çatıb.
“Bizim üçün ən sevindirici faktor qeyri-neft sektorunun ÜDM-dəki nisbətinin ötən il ərzində demək olar ki, 68%-ə çatmasıdır. Bilirsiniz ki, “PAŞA Bank” ASC-nin əsas missiyası və məqsədi qeyri-neft sektorunun inkişafına töhfə verməkdir. İstər kredit, istərsə də qeyri-kredit məhsulları vasitəsilə həmin inkişafın sürətlənməsi üçün xüsusi bir təkan verməyə çalışırıq. Ümumilikdə, biz ölkənin ən qabaqcıl banklarından biri və ən böyük korporativ bank olaraq sabit iqtisadi mühitdə işimizi davam etdirmişik. Qeyri-neft sektorunun artım tempi 6%-i ötüb.”
Cavid Quliyev sözlərinə əlavə edib ki, “PAŞA Bank” ASC və qeyri-neft sektorunun inkişafı bir-birinə çox bağlıdır. “Bizim biznes fəlsəfəmiz belədir: “PAŞA Bank” ASC, maliyyə tərəfdaşı olaraq, müştərilərinin inkişafını öz inkişafı olaraq görür. Müştərilərimizin inkişafı PAŞA Bank” ASC-nin də inkişafı deməkdir.”