Qızıl investisiyaları geniş spektrli və bir-biri ilə kəsişən geosiyasi və iqtisadi risklərlə şərtlənir, lakin Citi analitiklərinin fikrincə, bu risklərin təxminən yarısı ilin sonuna qədər aradan qalxa bilər.
Onların proqnozuna görə, qızıla tələbi dəstəkləyən əsas risklərdən bəziləri — ABŞ ilə Çin arasında gərginlik, Çin–Tayvan münasibətlərində risklər, ABŞ-ın dövlət borcu ilə bağlı narahatlıqlar və süni intellekt ətrafında qeyri-müəyyənlik — qiymətləri tarixi ölçülərlə müqayisədə yüksək səviyyədə saxlayacaq.
Bununla belə, bankın qiymətləndirməsinə əsasən, hazırda qızıl qiymətlərinə daxil edilmiş risklərin təxminən yarısı ya 2026-cı ildə reallaşmayacaq, ya da bu ildən sonra davam etməyəcək.
“Biz görürük ki, Tramp administrasiyası 2026-cı il aralıq seçkiləri ilində ABŞ üçün ideal şərait formalaşdırmağa çalışır və hesab edirik ki, Rusiya–Ukrayna müharibəsinin başa çatması və ardınca İranla bağlı münaqişənin de-eskalasiyası bugünkü vəziyyətlə müqayisədə risklərin əhəmiyyətli dərəcədə azalması deməkdir”, — bank əlavə edib.
Bu həftənin əvvəlində geosiyasi və iqtisadi qeyri-müəyyənlik fonunda qızılın spot qiyməti rekord həddə çataraq unsiya üçün 5600 dollar səviyyəsinə yaxınlaşıb.
Lakin cümə günü qiymətlər 12,6% enərək tarixdəki ən böyük gündəlik faiz enişlərindən birinə yaxın olub. Buna səbəb ABŞ dollarının möhkəmlənməsi olub: ABŞ prezidenti Donald Tramp Federal Ehtiyat Sisteminin sabiq idarəçisi Kevin Uorşu, Cerom Pauellin səlahiyyət müddəti may ayında başa çatdıqdan sonra ABŞ Mərkəzi Bankının rəhbəri postuna namizədi kimi açıqlayıb.
“Uorşun namizədliyinin təsdiqlənməsi, Federal Ehtiyat Sisteminin siyasi müstəqilliyini qoruyub saxlayacağına dair uzunmüddətli tezisimizi daha da gücləndirəcək ki, bu da orta müddətli perspektivdə qızıl qiymətləri üçün əlavə mənfi amildir”, — Citi-də bildirilib.