Azərbaycan Energetika Nazirliyi və Beynəlxalq Bərpa Olunan Enerji Agentliyinin (IRENA) birgə təşkilatçılığı ilə Bakıda Mərkəzi Asiya üzrə Enerji Keçidi İnvestisiya Forumu öz işinə başlayıb. İki günlük forumda Azərbaycan, Qazaxıstan, Qırğızıstan, Tacikistan, Özbəkistan və BƏƏ-dən olan yüksək səviyyəli rəsmilər iştirak edir.
GDP xəbər verir ki, tədbirdə “Orta Asiyada Sürətləndirilmiş Bərpa Olunan Enerji Tərəfdaşlığı” (APRECA) proqramı təsis edilib. Proqram regional əməkdaşlıq çərçivəsində investisiyaların genişləndirilməsini və regionlararası əlaqələrin gücləndirilməsini hədəfləyir.
Azərbaycan Energetika naziri Pərviz Şahbazov çıxışında Mərkəzi Asiya-Azərbaycan Yaşıl Enerji Dəhlizinin yaradılması istiqamətində başlanılan işbirliyi barədə məlumat verib. Nazir COP29 çərçivəsində Azərbaycan, Qazaxıstan və Özbəkistan arasında imzalanan yaşıl enerji tərəfdaşlığı sazişinin əhəmiyyətini vurğulayıb.
IRENA-nın Baş Direktoru Francesco La Camera isə Mərkəzi Asiyanın zəngin bərpa olunan enerji resurslarının və strateji mövqeyinin əhəmiyyətini qeyd edib.
Forum çərçivəsində enerji keçidinə dair investisiya və maliyyə siyasətləri, iqlim maliyyəsi və digər məsələlər müzakirə olunacaq.
