Dövlət Vergi Xidməti (DVX) tərəfindən sahibkarların ictimai birlikləri, auditorlar, konsaltinq şirkətləri və sahə assosiasiyaları üçün vergi və sosial sığorta qanunvericiliyindəki son dəyişikliklərə həsr olunmuş təqdimat tədbiri keçirilib.
GDP xəbər verir ki, tədbirdə bir sıra dövlət qurumlarının nümayəndələri və iqtisadçı ekspertlər iştirak ediblər. Çıxış edən Vergi Siyasəti Baş İdarəsinin rəisi Nicat İmanov islahatların əsas məqsədinin iqtisadi artımı, investisiya mühitini və sahibkarlığı təşviq etmək, həmçinin “kölgə iqtisadiyyatı”nın miqyasını azaltmaq olduğunu bildirib. O, qeyd edib ki, son illər ərzində sahibkarlar tərəfindən daxil olan 170 təklifdən 103-ü qanunvericiliyə dəyişikliklər zamanı nəzərə alınıb.
Əsas dəyişikliklər üç istiqamətdə formalaşıb:
-
İnvestisiya və sahibkarlığın təşviqi
-
Büdcə gəlirlərinin tənzimlənməsi
-
Vergi nəzarətinin təkmilləşdirilməsi
Daha sonra DVX rəhbərliyi tərəfindən edilən geniş təqdimatda 2026-cı ildə gözlənilən yeniliklərə işıq salınıb. Vergi Siyasəti Baş İdarəsinin müavini Əvəz Quliyev aşağıdakı dəyişiklikləri xəbər verib:
-
Naxçıvan MR və azad edilmiş ərazilər üçün vahid vergi rejiminin tətbiqi.
-
Fərdi sahibkarların sosial sığorta ödənişlərinin dövriyyəyə uyğun tənzimlənməsi.
-
Yerli avtomobil istehsalı, gəmiqayırma və kənd təsərrüfatı kimi prioritet sektorlara güzəştlərin verilməsi.
-
Nağdsız ödənişlərin təşviqi üçün pərakəndə ticarətdə POS-terminal limitinin 400.000 manata qaldırılması və nağdsız dövriyyənin yalnız 50%-nin ƏDV qeydiyyatı üçün nəzərə alınması.
-
Muzdlu işdən gəlirlər üzrə vergi yükünün optimallaşdırılması.
-
Elektron audit sisteminin ləğv edilərək, orta və iri vergi ödəyiciləri ilə münasibətləri şəffaflaşdıran “üfüqi monitorinq” mexanizminin tətbiqi.
-
Bərbərxana, gözəllik salonu və kosmetoloji mərkəzlərdə “ƏDV geri al” mexanizminin tətbiqi.
-
Fiziki şəxslərin kirayə gəlirləri üzrə vergi dərəcəsinin 14%-dən 10%-ə endirilməsi.
Tədbirin son hissəsində iştirakçıların sualları cavablandırılıb və təklif edilən dəyişikliklərin iqtisadiyyatın inkişafına gözlənilən müsbət təsirləri müzakirə olunub. Tədbir vergi ödəyiciləri ilə dövlət orqanları arasında səmərəli əməkdaşlığı gücləndirmək məqsədi daşıyır.
