Əmək və Əhalinin Sosial Müdafiəsi Nazirliyi tabeliyində Dövlət Məşğulluq Agentliyinin İdarə Heyətinin sədri Sadiq Əliyev AzerGold QSC-nin Daşkəsən rayonunda yerləşən Çovdar İnteqrəolunmuş Regional Emal Sahəsində olub.
GDP xəbər verir ki, S.Əliyev “Çovdar” qızıl mədənində hasilat, ÇİRES-də qiymətli metalların emalı, tullantıların idarə olunması prosesini izləyib, ənənəvi Topa qələviləşdirmə üsulu ilə yanaşı, Çəndə qələviləşdirmə texnologiyası ilə qiymətli metalların emalını həyata keçirən Çəndə Qələviləşdirmə Zavodunda yaradılmış əmək şəraiti ilə tanış olub.
Tanışlıq səfərindən məmnunluğunu ifadə edən DMA-nın İdarə Heyətinin sədri S.Əliyev “AzerGold” QSC tərəfindən dağ-mədən sahəsində həyata keçirilən uğurlu fəaliyyətin qeyri-neft sektoru üzrə ölkə iqtisadiyyatının inkişafı, xüsusilə Gəncə-Daşkəsən iqtisadi rayonunun sosial-iqtisadi tərəqqisi, əhalinin məşğulluğunun artırılmasında mühüm əhəmiyyət kəsb etdiyini qeyd edib.
