Azərbaycanın “Agalarov Development” şirkəti Özbəkistanın Çarvak su anbarı regionunda rekord həcmdə investisiya ilə yeni turizm kompleksinin tikintisinə başlayır. “Sea Breeze Uzbekistan” adlanan layihə üçün 5 milyard dollar sərmayə ayrılıb.
GDP xəbər verir ki, 577 hektar ərazidə “kurort-şəhər” konsepsiyası əsasında inşa ediləcək kompleks il boyu fəaliyyət göstərəcək premium turizm mərkəzi kimi fəaliyyət göstərəcək. Layihənin birinci mərhələsində 100 hektar ərazidə tikinti işləri görüləcək və minlərlə yeni iş yeri yaradılacaq.
Özbəkistanın İnvestisiyalar, Sənaye və Ticarət Nazirliyinin məlumatına görə, IV Daşkənd Beynəlxalq İnvestisiya Forumu çərçivəsində imzalanan sazişə əsasən, ilk obyektlər 2026-2027-ci illərdə istifadəyə veriləcək. Əvvəllər layihənin 10 milyard dollar dəyərində olacağı bildirilsə də, yekun investisiya həcmi 5 milyard dollar olaraq təsdiqlənib.
Ötən ilin yayında “Agalarov Development” şirkəti də Daşkəndin mərkəzində yaşayış kompleksi və mehmanxana tikintisini elan edib. Layihənin dəyəri 133 milyon dollar qiymətləndirilir.
Qeyd edək ki, 2024-cü ilin dekabrında bu layihə Özbəkistan Prezidenti Şavkat Mirziyoyevə təqdim edilmişdi. Eyni zamanda Agalarov Development Daşkənddə 133 milyon dollarlıq yaşayış kompleksi də tikdirir. Şirkət Azərbaycanda uğurla həyata keçirdiyi Sea Breeze modelini indi də regionda genişləndirir.
