Goldman Sachs analitiklərinin proqnozlarına görə, Brent markalı neftin qiyməti təklifin artması və ehtiyatların daha sürətli böyüməsi səbəbindən daha da enəcək. Analitiklər hesab edirlər ki, gələn il neftin qiyməti bir barel üçün 50 ABŞ dollarına düşəcək.
Reuters-in məlumatına görə, Goldman Sachs analitikləri hesab edirlər ki, 2026-cı ilin sonuna qədər Brent markalı neftin qiyməti bir barel üçün 50 ABŞ dollarına qədər enə bilər. Bu, bazara təklifin artması və ehtiyatların sürətli şəkildə yığılması ilə bağlıdır.
27 avqust, çərşənbə günü keçirilən ticarət sessiyasında London ICE birjasında noyabr fyuçerslərinin qiyməti 0,4% azalaraq bir barel üçün 66,4 ABŞ dolları olub (Bakı vaxtı ilə 10:53-ə olan göstərici).
Bankın gözləntilərinə görə, 2025-ci ilin dördüncü rübündə neft bazarında gündəlik orta hesabla 1,8 milyon barel profisit yaranacaq və bu vəziyyət 2026-cı ilin dördüncü rübünə qədər davam edəcək. Nəticədə, 2026-cı ilin sonuna qədər dünya üzrə neft ehtiyatları təxminən 800 milyon barel artacaq.
Goldman Sachs analitiklərinin qiymətləndirmələrinə görə, 2026-cı ildə İqtisadi Əməkdaşlıq və İnkişaf Təşkilatına (OECD) üzv ölkələrdəki neft ehtiyatlarının payı ümumi dünya ehtiyatlarının üçdə birinə — təxminən 270 milyon barelə çatacaq. OECD ölkələrində neftə olan tələbin azalacağı gözlənildiyi üçün bu amil neftin qiymətinə əlavə təzyiq göstərəcək.
ABŞ-ın Hindistana qarşı Rusiyadan neft alışı ilə bağlı tətbiq etdiyi 25%-lik əlavə rüsum Hindistandan idxal olunan mallara ümumi rüsumu 50%-ə çatdırıb. Lakin ING analitiklərinin qeyd etdiyinə görə, bu rüsumlar Hindistanın Rusiya nefti almasını tam dayandırmağa kifayət etməyib. Başlanğıcda Hindistan neft emalı zavodları alışları dayandırsa da, sonradan yenidən davam etdiriblər. Analitiklər bildirirlər ki, bazar yaxın vaxtlarda Hindistana Rusiya neftinin təchizatına diqqətlə nəzarət edəcək.
Bloomberg-in yazdığına görə, bu il ticarət müharibələri, dünya üzrə neftə tələbatla bağlı narahatlıqlar və OPEC+ tərəfindən hasilat məhdudiyyətlərinin ləğvi fonunda Brent neftinin qiyməti təxminən 10% azalıb. Bu isə bazarda artıq təklif risklərini gücləndirib.
Avqustun əvvəlində OPEC+ ölkələri sentyabr ayından hasilatı əhəmiyyətli dərəcədə artırmaq barədə razılığa gəliblər. Ən böyük neft istehsalçıları — Rusiya, Səudiyyə Ərəbistanı, İraq, BƏƏ, Küveyt, Qazaxıstan, Əlcəzair və Oman — sentyabr ayından etibarən hasilatı gündəlik 547 min barel artırmaq barədə razılaşıblar. Bu addım könüllü hasilat azaldılmasını (gündəlik 2,2 milyon barel) əvvəlcədən kompensasiya etməyə imkan verir. Əvvəlcə ölkələr yalnız 2026-cı ilin sentyabr ayının sonuna qədər məhdudiyyətlərin mərhələli şəkildə ləğvini planlaşdırırdılar.
Bu qərar dünya iqtisadiyyatının sabit perspektivləri və hazırkı əlverişli bazar şəraiti nəzərə alınaraq qəbul edilib. OPEC+ nümayəndələri bildirib ki, hazırda neft ehtiyatları aşağı səviyyədədir, bu isə istehsal artımını əsaslandırır.
Hazırda Brent markalı neftin qiyməti OPEC+ ölkələrinin hasilatı artırması fonunda müəyyən sabitlik nümayiş etdirir, lakin «VİM İnvestisiya» analitiklərinin fikrincə, bu sabitlik müvəqqəti ola bilər və yüksək mövsümi yanacaq tələbatı ilə bağlıdır.
Hedge-fond Black Gold Investors-un meneceri Qeri Ross isə hesab edir ki, neft bazarı artıq təklif bolluğu vəziyyətinə yaxınlaşır:
“İnsanlar bunu çoxdan deyirdilər — hamı dördüncü rüblə bağlı pessimist əhval-ruhiyyədədir — və biz uçurumun kənarına yaxınlaşırıq,” — deyə o bildirib.