Hesablama Palatasının sədri Vüqar Gülməmmədovun rəhbərliyi ilə keçirilən Kollegiya iclasında Azərbaycan Respublikası Milli Məclisinin komitə sədri Sadiq Qurbanov, Milli Məclisin üzvləri Tahir Mirkişili, Vüqar Rəhimzadə, Ekologiya və Təbii Sərvətlər nazirinin müavini Vüqar Kərimov və nazirliyin digər məsul şəxsləri iştirak ediblər.
GDP xəbər verir ki, iclasda “Təhlükəsiz tullantıların idarə olunmasının səmərəliliyinin və nəticəliliyinin qiymətləndirilməsinin auditinin nəticələrinə dair Auditor hesabatı” müzakirə edilib. Hesabatda Azərbaycan Respublikasının Ekologiya və Təbii Sərvətlər Nazirliyi, “Təmiz Şəhər” Açıq Səhmdar Cəmiyyəti, Bakı, Sumqayıt, Gəncə, Mingəçevir, Yevlax, Şirvan şəhərlərinin icra hakimiyyətləri, həmçinin Abşeron, Ağcabədi, Bərdə və Beyləqan rayon icra hakimiyyətlərinin fəaliyyəti əhatə olunub.
Audit nəticələrinə görə, təhlükəsiz tullantıların idarə olunması prosesində bir sıra çətinliklər və nöqsanlar aşkar edilib. Bunlar arasında abonent bazasının tam yaradılmaması, xidmət haqları üzrə potensialın reallaşdırılmaması, nağd əməliyyatlara üstünlük verilməsi, regional poliqonlarda sanitar-epidemioloji və ekoloji normaların pozulması, mütərəqqi üsulların genişləndirilməməsi, tarifləşmənin iqtisadi əsaslarının texnoloji tərəflərlə uyğunsuzluğu, strateji və əməliyyat planlaşdırılmasının qüsurları, maliyyə hesabatlılığı və dövlət satınalmaları prosedurlarında şəffaflığın təmin edilməməsi, statistik hesabatlılıqda uyğunsuzluqlar, icazə verilməyən ünvanlarda yaranmış tullantı sahələrinin aradan qaldırılmaması və dövlət büdcəsinə asılılığın davam etməsi kimi məsələlər qeyd edilib.
Ekologiya və Təbii Sərvətlər nazirinin müavini Vüqar Kərimov auditin nəticələrinin bu sahədə fəaliyyətin təkmilləşdirilməsinə xidmət edəcəyini və Hesablama Palatasının təklif və tövsiyələrinin nəzərə alınacağını bildirib.
Milli Məclisin deputatları müzakirələr zamanı aşkar edilən problemlərlə bağlı fikirlərini bildirib və təkliflər irəli sürüblər. İclasın nəticəsində auditor hesabatının təsdiq edilməsi və aşkar edilən nöqsanların aradan qaldırılması üçün zəruri tədbirlərin görülməsi barədə qərar qəbul edilib.
