İcbari Sığorta Bürosunun İcraçı Direktoru Vüsal Məsiyev, yeni xidmətin istifadəyə verildiyini açıqlayıb.
GDP-nin məlumatına görə, O, bildirib ki, bu yeni məhsul xarici nəqliyyat vasitə sahiblərinə sərhəd keçid məntəqələrinə gəlmədən onlayn şəkildə sərhəd sığorta şəhadətnamələri əldə etməyə imkan verəcək.
Vüsal Məsiyev qeyd edib ki, yeni layihə dövlət sərhədindən buraxılış məntəqələrində əməliyyatları sadələşdirərək, sığorta xidmətlərinin daha əlçatan olmasını təmin edir. Onun sözlərinə görə, bu addım sektorda sığorta xidmətlərinin əlçatanlığı baxımından böyük əhəmiyyət kəsb edir.
“Bu layihə, həmçinin vətəndaşların və sahibkarların sərhəd keçid əməliyyatlarını daha sürətli və rahat şəkildə yerinə yetirmələrinə şərait yaradacaq. Bütün komandamıza bu uğurlu addımın atılmasında göstərdikləri əzmkarlıq üçün təşəkkür edirəm,” — deyə İcbari Sığorta Bürosunun İcraçı Direktoru əlavə edib.
Yeni onlayn xidmətin istifadəyə verilməsi ilə sığorta sahəsində müştərilərə təqdim olunan xidmətlər daha da asanlaşacaq və rəqəmsal xidmətlərin əhatəsi genişlənəcək.