İpoteka Kredit Zəmanət Fondunun (Fondun)Baş Meneceri Rasim Abdullayev bildirib ki, fond mütəmadi olaraq daşınmaz əmlak bazarında qiymət artımını müşahidə edir. Bu müddət ərzində fondun orta ipoteka kredit göstəricisi 102 min 340 manat təşkil edib.
GDP-nin Fondun Baş Menecerinin təqdimatında ölkənin əmlak bazarında qiymət artımının müşahidə edildiyini qeyd etməsinə baxmayaraq, İpoteka Kredit Zəmanət Fondunun təqdim etdiyi ipoteka kreditinin maksimal məbləğinin artırılmaması ilə bağlı sualına cavab olaraq Rasim Abdullayev bildirib ki, verilən ipoteka kreditlərinin orta məbləği 150 min manata yaxınlaşarsa, maksimal məbləğin artırılması məsələsinə baxılacaq.Lakin hazırda, fonddan verilən kreditlərin maksimal həddinin artırılmasına zərurət olmadığını vurğulayıb.
Baş Menecer əlavə edib ki, ipoteka kreditlərinin məbləğini artırmaq iqtisadiyyata multiplikativ təsir göstərə bilər və bu, daşınmaz əmlak bazarındakı volatilliyi daha da artıra bilər. “Bizim əsas məqsədimiz aşağı və orta gəlirli vətəndaşların ipoteka kreditlərinə çıxışının təmin edilməsidir. Daha bahalı əmlak almaq istəyənlər isə bankların daxili ipoteka kreditlərindən faydalana bilərlər,” – deyə Abdullayev bildirib.
Fondun əsas məqsədi cəlb edilən resurslar çərçivəsində daha çox vətəndaşın mənzil təminatını yaxşılaşdırmaqdır.
Qeyd edək ki, İpoteka Kreditləri üçün maksimal məbləğ 150,000 AZN, maksimal müddət 25 il, minimal ilkin ödəniş isə 15% təşkil edir. İpoteka kreditləri üzrə maksimal illik faiz dərəcəsi zəmanət verilmiş kreditlər üçün 8%, zəmanət verilməmiş kreditlər üçün isə 7% müəyyən edilib.
Güzəştli İpoteka Kreditləri üçün isə maksimal məbləğ 100,000 AZN, maksimal müddət 30 il, minimal ilkin ödəniş isə 10% olaraq təyin edilib. Güzəştli ipoteka kreditləri üzrə maksimal illik faiz dərəcəsi zəmanət verilmiş kreditlər üçün 4%, zəmanət verilməmiş kreditlər üçün isə 3.7% müəyyən olunub.