İranda davam edən iqtisadi böhran və sürətli inflyasiya fonunda ölkənin mərkəzi bankı nominal dəyəri 10 milyon rial olan yeni əskinası dövriyyəyə buraxıb.
GDP xəbər verir ki, hazırkı məzənnə ilə cəmi 7 ABŞ dolları dəyərində olan bu əskinas ölkənin indiyədək çap etdiyi ən böyük nominal hesab olunur.
Yeni əskinasın dövriyyəyə çıxarılması vətəndaşların diqqətini cəlb etsə də, real alıcılıq qabiliyyətinin aşağı olması əhalinin narahatlığını artırıb. Xüsusilə son həftələrdə ölkədə bankomatlar qarşısında uzun növbələr müşahidə edilir. Müşahidəçilər bunu vətəndaşların müharibə təhlükəsi və iqtisadi qeyri-müəyyənlik səbəbindən əmanətlərini nağd şəkildə evdə saxlamaq istəyi ilə əlaqələndirirlər.
İqtisadçıların fikrincə, əhalinin bank sisteminə etimadsızlığı və rialın məzənnəsinə olan təzyiqlər qarşıdakı aylarda inflyasiyanın daha da dərinləşməsinə səbəb ola bilər. Mərkəzi bank isə hələlik yeni əskinasın dövriyyəyə buraxılmasını pul təklifində yaranan çətinliklərin həlli kimi izah edir.