Yaxın Şərqdə İranın nüvə obyektlərinə hərbi zərbə endiriləcəyi ilə bağlı yayılan şayiələr neft bazarlarında təlatüm yaratdı.
GDP xəbər verir ki,nəticədə Brent xam neftinin qiyməti bir gün ərzində +4.14% artaraq barrelə 69.64 ABŞ dolları səviyyəsinə qalxdı. ABŞ-nin hərbi hərəkətləri də gərginliyi daha da alovlandırdı: Qətərdə yerləşən strateji Əl-Udeyd də daxil olmaqla bölgədəki bütün ABŞ hərbi bazaları “yüksək hazırlıq” rejiminə keçirildiyi təsdiqlənir. Ağ Ev rəsmiləri, Prezident Trump-ın Yaxın Şərqdən ikinci dərəcəli hərbi personalın və hərbi qulluqçuların ailə üzvlərinin təxliyəsi prosesini birbaşa izlədiyini açıqladı.
Bazarın reaksiyası kəskin oldu: Neft qiymətləri günə 66.50 dollar səviyyəsindən başlayaraq davamlı şəkildə qalxışa keçdi və ticarət sessiyasının sonunda 69.64 dollara çatdı. Maliyyə təhlilçiləri, gərginliyin davam etməsi halında qiymətlərin 70 dollar həddini sınayacağını, hətta real hərbi əməliyyat baş verdiyi təqdirdə barelin 80 dollar üzərinə qalxma ehtimalı olduğunu bildirirlər.