Rusiyanın “Lukoil” neft şirkəti, Azərbaycanın ən böyük qaz-kondensat yatağı “Şahdəniz”də 19,9% paya malikdir ki, bu da yatağın beşdə birinə bərabərdir. Hal-hazırda şirkət sanksiyalar səbəbindən həmin payını satmaq məcburiyyətindədir.
Məlumata görə, sanksiyalar şirkətin layihələrin maliyyələşdirilməsi üçün öz maliyyə öhdəliklərini yerinə yetirməsinə mane olur. Razılaşma şərtlərinə əsasən, konsorsiumun hər bir üzvü öz payına düşən xərcləri ödəməlidir. Sanksiyalar səbəbindən “Lukoil” bu ödənişləri vaxtında həyata keçirə bilməyəcək.
Mənbələr bildirir ki, şirkət gecikmə ödənişlərinə görə yüksək cərimələrlə üzləşə bilər. Buna görə də “Lukoil” öz payını satmaq qərarına gəlib. Satışın 13 dekabr tarixinə qədər baş tutması gözlənilir. Hesab edilir ki, şirkət aktivlərini dünya bazarında qiymətlərin 30-40% aşağı qiymətlə tələsik satmağa çalışır.
Analitiklərin fikrincə, “Şahdəniz” konsorsiumunun digər iştirakçıları, o cümlədən “SOCAR” və “BP” bu payı ala bilərlər. Ehtimal olunur ki, konsorsiumun digər üzvləri də maraq göstərə bilər.