Kənd Təsərrüfatı Naziri Məcnun Məmmədov BMT-nin Ərzaq və Kənd Təsərrüfatı Təşkilatının (FAO) 44-cü sessiyası çərçivəsində Estoniya Respublikasının Regional İşlər və Kənd Təsərrüfatı Naziri Hendrik Yohannes Terras ilə məhsuldar görüş keçirib.
GDP xəbər verir ki, görüş zamanı tərəflər kənd təsərrüfatı sahəsində qarşılıqlı əməkdaşlığın genişləndirilməsi istiqamətində konkret addımlar müzakirə ediblər.
İki ölkə arasında əməkdaşlığın daha da dərinləşdirilməsi məqsədilə əməkdaşlıq memorandumunun yenilənməsi, birgə işçi qrupunun yaradılması, heyvandarlıq və süni mayalanma sahələrində təcrübə mübadiləsinin təşkili, həmçinin kənd təsərrüfatı məhsullarının ticarət dövriyyəsinin genişləndirilməsi və Azərbaycan meyvələrinin Estoniyaya ixrac imkanları müzakirə olunub.
Nazir Məmmədov xüsusi vurğulayıb ki, heyvandarlıq və süni mayalanma sahələrində Estoniyanın qazanılmış təcrübəsindən yararlanmaq Azərbaycan üçün xüsusi əhəmiyyət kəsb edir. Eyni zamanda, Azərbaycan meyvələrinin Estoniya bazarına nüfuz etməsi ölkəmizin kənd təsərrüfatı məhsullarının Avropa İttifaqı bazarında mövqeyini daha da gücləndirə biləcək potensiala malikdir.
Tərəflər yaxın gələcəkdə yaradılacaq birgə işçi qrupunun əməkdaşlığın konkret istiqamətləri üzrə iş planı hazırlayacağını bildiriblər. Bu təşəbbüs hər iki ölkənin kənd təsərrüfatı sahəsində qarşılıqlı faydalı əməkdaşlığının inkişafına xidmət edəcək.
