Azərbaycan Konsaltinqlər Assosiasiyası və Resurs Effektivliyi Mərkəzinin birgə təşkilatçılığı ilə “Mənfəət vergisi bəyannaməsinin hazırlanması və Vergi Məcəlləsindəki dəyişikliklər: Yeni tələblər və praktik yanaşmalar” adlı seminar keçirilib.
Bakı KOB Evində təşkil olunan tədbirə maliyyə idarəetməsi və mühasibat uçotu sahəsində çalışan yüzdən çox şəxs qatılıb. Azərbaycan Konsaltinqlər Assosiasiyasının İdarə Heyətinin sədri Əminə Quliyeva açılış nitqi ilə çıxış edərək bu istiqamətdə maarifləndirmə tədbirinin keçirilməsində əsas məqsədin vergi qanunvericiliyində nəzərdə tutulan yeniliklər barədə iştirakçıların məlumatlılığının artırılması, mühasibat uçotu və vergi məsələlərində mövcud təcrübə barədə müzakirənin aparılmasından ibarət olduğunu bildirib.
Tədbirdə mənfəət vergisi bəyannaməsinin tərtib edilməsi, şirkətin illik gəlir və xərclərini göstərən məlumatların düzgün hazırlanması qaydaları, vergi qanunvericiliyi, o cümlədən mənfəət vergisinin hesablanması, vergi güzəştləri və istisnaları, mənfəət bəyannaməsində mümkün səhvlərin və yanlışlıqların qarşısını almaq üçün tədbirlər, vergi və maliyyə riskləri və digər mövzular barədə geniş məlumat verilib.
Resurs Effektivliyi Mərkəzinin həmtəsisçisi Tural Məmmədov və Azərbaycan Konsaltinqlər Assosiasiyasının İdarə Heyətinin üzvü, eyni zamanda Resurs Effektivliyi Mərkəzinin həmtəsisçisi Namiq Qurbanovun ekspert qismində çıxış etdiyi tədbir zamanı iştirakçıların Vergi Məcəlləsindəki dəyişikliklər və maliyyə sahəsindəki təklif olunan həllər istiqamətində sualları cavablandırılıb.
