Mərkəzi Bank pul siyasəti alətlərini maliyyə bazarlarında gedən proseslər və bank sisteminin likvidlik mövqeyindəki dəyişikliklər nəzərə alınmaqla tətbiq edir. Ötən iclasdan bəri təminatsız pul bazarında faizlər Mərkəzi Bankın faiz dəhlizi daxilində hərəkət edib.
GDP xəbər verir ki, məlumata görə, AZİR (Banklararası Təminatsız Pul Bazarında İstinad Faiz Dərəcəsi-Azerbaijan Interbank Rate) indeksi ilə uçot dərəcəsi arasındakı fərq tarixi minimuma enib. AZİR indeksinin orta günlük səviyyəsi iyulda 7,15%, avqustda 6,97%, sentyabrın ötən dövründə isə 6,98% təşkil edib.
Ötən iclasdan bəri AZİR indeksindəki enişə paralel olaraq gəlirlik əyrisində və Mərkəzi Bankın notları üzrə gəlirlilikdə də azalmalar qeydə alınıb. Eyni zamanda fiziki şəxslərin manatla depozitləri üzrə faizlərdə azalmalar müşahidə olunub.
Bu prosesdə Maliyyə Nazirliyi tərəfindən aprel ayından etibarən vahid xəzinə hesabının sərbəst qalığının yerləşdirilməsi üzrə keçirilən depozit hərracları bank sektorunun likvidlik mövqeyinə artırıcı təsir göstərməkdə davam edir.
Bu şəraitdə Mərkəzi Bank 1 həftəlik açıq bazar əməliyyatları ilə pul siyasətindən kənar amillərin AZİR-ə təsirini minimallaşdırmağa çalışır. Pul bazarında aktivlik yüksək olaraq qalır. 2025-ci ilin 8 ayında ötən ilin müvafiq dövrünə nəzərən təminatsız bazarda əqdlərin sayı 19% artıb.