Azərbaycan Mərkəzi Bankı (AMB) maliyyə savadlılığının artırılması və maliyyə inklüzivliyi sahəsində beynəlxalq əməkdaşlığın genişləndirilməsi çərçivəsində qtisadi Əməkdaşlıq və İnkişaf Təşkilatının (İƏİT) Beynəlxalq Maliyyə Savadlılığı Şəbəkəsinə (BMSŞ) tamhüquqlu üzv qəbul edilib.
GDP Mərkəzi Banka istinadla xəbər verir ki, bu qərar çərçivəsində AMB şəbəkənin “Maliyyə savadlılığı standartları: tətbiqi və qiymətləndirilməsi”, “Rəqəmsal maliyyə savadlılığı” və “Maliyyə savadlılığı və davamlı maliyyə” üzrə işçi qruplarında fəal iştirak hüququ qazanıb. Üzvlük, eyni zamanda, Banka beynəlxalq səviyyədə hazırlanan siyasət sənədlərinin formalaşdırılması prosesinə birbaşa daxil olmaq və dünyanın qabaqcıl təcrübələri ilə tanış olmaq imkanı yaradır.
Mərkəzi Bankın bu addımı ölkədə maliyyə savadlılığı proqramlarının beynəlxalq standartlara uyğun tətbiqinə, vətəndaşlar üçün maliyyə məlumatlarının əlçatanlığının artırılmasına və maliyyə xidmətlərinə çıxışın genişləndirilməsinə əhəmiyyətli dərəcədə töhfə verəcək.
Qeyd edək ki, İƏİT-in Beynəlxalq Maliyyə Savadlılığı Şəbəkəsi maliyyə təhsili məsələləri ilə məşğul olan tənzimləyici orqanlar və digər qurumlar üçün əsas əməkdaşlıq platformasıdır. Şəbəkə beynəlxalq müqayisəli məlumatların toplanması, siyasət təhlillərinin aparılması və səmərəli siyasət alətlərinin işlənib hazırlanması ilə məşğuldur.