Mərkəzi Bankın “Faiz dəhlizinin parametrləri haqqında” press-relizində bildirilir ki, maliyyə bazarlarındakı proseslər və bank sisteminin likvidlik mövqeyindəki dəyişikliklər nəzərə alınmaqla pul siyasəti alətləri tətbiq edilir.
Ötən ilin sonunda hökumət hesabları qalıqlarının azalması bank sistemindəki likvidliyə artırıcı təsir göstərib. Bunun nəticəsində cari ilin əvvəlində banklararası pul bazarında faizlər 2024-cü ilin dekabrındakı pik səviyyədən (1D AZIR 7.68%) aşağı düşüb. Yanvar və fevral aylarında orta günlük 1D AZIR ötən ilin dekabr ayı ilə müqayisədə müvafiq olaraq 0.6 və 0.2 faiz bəndi azalıb.
Press-relizdə həmçinin qeyd olunur ki, 2025-ci ilin fevral ayında pul siyasətinin əməliyyat çərçivəsinin təkmilləşdirilməsi işləri davam etdirilib. Daimi imkan və açıq bazar əməliyyatlarının aparılması şərtlərində dəyişikliklər edilib: bir günlük daimi imkan depozit və əks-repo əməliyyatların müddəti 24 saatdan 1 gecəliyə keçirilib və not hərraclarında minimum iştirakçı sayına qoyulan tələb aradan qaldırılıb.