Mərkəzi Bankın (AMB) sədri Taleh Kazımov qurumun faiz dəhlizinin parametrləri ilə bağlı qərarına həsr olunmuş mətbuat konfransında bildirib ki, manata inam yüksəkdir və bunun arxasında müəyyən rəqəm və faktlar dayanır.
“Mən çıxışımda da qeyd etdim ki, dollarlaşma səviyyəsi 29%-ə düşüb. Mərkəzi Bankın hədəfi bu rəqəmi 20-25% ətrafında idarə etməkdir və bu normaldır. Yəni bizim gözləntimiz olmasın ki, dollarlaşma səviyyəsi 0% olsun” – deyə Taleh Kazımov vurğulayıb.
Nağd bazarına gəldikdə isə Taleh Kazımov təklifin tələbi üstələdiyini və sentyabr ayı üzrə bu göstəricinin 230 milyon manat olduğunu açıqlayıb.
Taleh Kazımov strateji valyuta ehtiyatlarının il ərzində 14,7% artaraq 81,5 milyard ABŞ dollarına çatdığını da bildirib. O, xüsusilə vurğulayıb ki, strateji valyuta ehtiyatları ümumi manat kütləsini 3,7 dəfə üstələyir: “Yəni manatın dayanıqlığı barədə heç kimdə şübhə olmamalıdır.”
AMB sədri də cari əməliyyat balansının bu il və gələn il üzrə profisitli olacağı proqnozunun da manatın dayanıqlılığına inamı gücləndirdiyini ifadə edib.
“Hazırda manatın dayanıqlı olması tək mənim daxili istəyim və fikrim deyil, bu rəqəmlərdir, faktlardır” – deyə Taleh Kazımov vurğulayıb.
O, həmçinin Avropa Yenidənqurma və İnkişaf Bankının (AYİB) manatla istiqraz buraxmasını Azərbaycan iqtisadiyyatına və manata inam, həmçinin Mərkəzi Bank tərəfindən həyata keçirilən islahatların dəstəyi kimi qiymətləndirib. AYİB-in AZİR indeksini özləri üçün faiz dərəcəsi kimi qəbul etməsini isə AMB sədri böyük nailiyyət adlandırıb.
Müəllif: Aynur Qəniyeva