Mərkəzi Bankın Ödəniş xidmətləri və ödəniş sistemlərinin fəaliyyətinin tənzimlənməsi şöbəsinin rəisi Xəyaləddin Tağıyev bildirib ki, ödəniş təşkilatları və elektron pul təşkilatları bankların təqdim etdiyi maliyyə xidmətlərinin yalnız bir hissəsini – ödəniş xidmətlərini həyata keçirə bilirlər. Bu səbəbdən, göstərdikləri xidmətlərə uyğun olaraq onlara banklarla müqayisədə daha yüngül prudensial tələblər tətbiq edilir.
Tağıyev vurğulayıb ki, məhz bu səbəbdən ödəniş və elektron pul təşkilatlarının müştərilərinə məxsus vəsaitlər banklarda saxlanılmalıdır. Banklar bu təşkilatlar üçün müştərilər adına xüsusi cari hesablar, eləcə də təşkilatların öz vəsaitlərinin idarə edilməsi üçün ümumi cari hesablar açmalıdır.
İki mühüm sual və cavab
Məsələ ilə bağlı iki əsas sual yaranır:
1. Ödəniş təşkilatları banklardakı cari hesablarından müştərilər üçün açılmış xüsusi cari hesablara pul köçürə bilərmi?
Tağıyevin sözlərinə görə, bu halda təşkilatın öz vəsaitləri ilə müştərilərin pulları eyni hesabda saxlanılmış olur. Bu isə artıq müştəri vəsaitlərinin sığortalanması və ya zəmanət altına alınması tələblərini gündəmə gətirir. Belə əməliyyat həyata keçiriləcəksə, Mərkəzi Banka əvvəlcədən məlumat verilməlidir.
2. Ödəniş təşkilatlarının banklardakı xüsusi cari hesablarına fərdi sahibkar və ya hüquqi şəxslər gələcəkdə ödəniş etmək məqsədilə pul köçürə bilərmi?
Cavab xeyrdir. Ödəniş qanunvericiliyinə əsasən, xüsusi cari hesablara öncədən ödəniş məqsədilə vəsait qəbul edilə bilməz. Bundan əlavə, vergi qanunvericiliyi baxımından bu əməliyyat vergidən yayınmaya şərait yarada bilər.
Mərkəzi Bankın mövqeyinə görə, bu qaydalar həm maliyyə sabitliyini qorumaq, həm də müştərilərin vəsaitlərinin təhlükəsizliyini təmin etmək məqsədi daşıyır.