Azərbaycan Respublikasının Mərkəzi Bankının sədri Taleh Kazımovun rəhbərlik etdiyi nümayəndə heyəti Çin Xalq Respublikasında işgüzar səfəri çərçivəsində Çin Kapital Bazarlarının Tənzimlənməsi Komissiyasının (ÇKBTK) sədri Vu Qinq ilə geniş görüş keçirib.
Görüşdə tərəflər iki ölkənin kapital bazarının mövcud vəziyyəti və inkişaf perspektivləri, habelə tənzimləyici-nəzarət mexanizmlərində aparılan yeniliklər barədə fikir mübadiləsi aparıblar. Xüsusi diqqət kapital bazarında innovativ alətlərin tətbiqinə və müasir texnoloji trendlərə yönəldilib.
Müzakirələr zamanı investorların hüquqlarının qorunması, kiçik investorların kapital bazarlarına cəlb edilməsi kimi mühüm məsələlər də araşdırılıb.
Tədbir çərçivəsində Azərbaycan Mərkəzi Bankı ilə ÇKBTK arasında gələcək əməkdaşlığın istiqamətləri, o cümlədən birgə layihə və təşəbbüslərin həyata keçirilməsi imkanları da müzakirə olunub. Bu görüş, iki ölkə maliyyə qurumları arasında strateji dialoqun daha da dərinləşməsi baxımından qiymətləndirilir.