Azərbaycan Respublikası Dövlət Neft Fondu (ARDNF) Böyük Britaniyanın ən mühüm nəqliyyat qovşaqlarından biri olan London Qatvik Hava Limanına 50 milyon funt sterlinq məbləğində investisiya həyata keçirib.
Bu investisiya, “BlackRock”un tərkibinə daxil olan “Global Infrastructure Partners” (GIP) investisiya şirkəti ilə tərəfdaşlıq çərçivəsində reallaşıb və ARDNF-ın Avropa bazarında həyata keçirdiyi ən əhəmiyyətli infrastruktur investisiyalarından biri olmaqla, Fondun qlobal infrastruktur layihələrində uzunmüddətli iştirakını nümayiş etdirir.
Neft Fondunun İcraçı direktorunun müavini Bəhruz Bəhramov investisiya fəlsəfəsi ilə bağlı fikirlərini bölüşərək bildirib: “Neft Fondunda biz uzunmüddətli investisiyaların bazarın nəbzini tutmaqla yox, zamanın özünü anlamaqla bağlı olduğuna inanırıq. Sərvət fondları səbirli, intizamlı və qlobal səviyyədə bağlı olmalıdır. Diqqətimiz həm indiki iqtisadiyyata xidmət edən, həm də gələcək nəsilləri qoruyan davamlı dəyər və real təsiri birləşən aktivlərdədir.”
Böyük Britaniyanın ikinci ən işlək hava limanı olan London Qatvik hər il 40 milyondan artıq sərnişinə xidmət göstərir və 2024-cü ildə Avropanın ən işlək on hava limanı sırasında yer alıb. Hökumətin Şimal Uçuş Zolağı layihəsini təsdiqləməsi ilə əlaqədar hava limanının 2030-cu illərin sonuna qədər illik sərnişin axınının təxminən 75 milyona çatması proqnozlaşdırılır. Qatvik həm də 23 mindən çox iş yeri yaradaraq ölkə iqtisadiyyatına milyardlarla funt sterlinq töhfə verir.
Uzunmüddətli Strategiya və Tərəfdaşlıq
2019-cu ildə “VINCI Airports” hava limanının 50,01%-ni aldıqdan sonra, qalan pay GIP, ARDNF və digər beynəlxalq institusional investorlar tərəfindən birgə idarə olunmağa davam edir.
ARDNF-ın İcraçı direktoru İsrafil Məmmədov qeyd edib: “Bu mühüm investisiya layihəsi, davamlı dəyər və strateji əhəmiyyət daşıyan aktivlər üzrə dünyanın aparıcı tərəfdaşları ilə əməkdaşlığa əsaslanan strategiyamızın bariz nümunəsidir. Qatvik hava limanı Fondun qlobal və uzunmüddətli investisiya yanaşmasını əks etdirən etibarlı və perspektivli aktivdir.”
GIP-nin təsisçisi, sədri və baş icraçı direktoru Adebayo Ogunlesi isə bildirib: “Qatvik hava limanı kimi mühüm bir aktiv üzrə ARDNF ilə tərəfdaşlığımızın davam etməsindən məmnunuq. Bu, həm investorlar, həm də cəmiyyət üçün uzunmüddətli dəyər və davamlı inkişaf təmin edən yüksək keyfiyyətli infrastruktur layihəsidir.”
Bu investisiya ARDNF-ın dayanıqlı infrastruktur aktivlərinə sərmayə qoymaqla investisiya portfelini daha da şaxələndirmək strategiyasının tərkib hissəsidir.