NEQSOL Holdinqin İdarə Heyətinin üzvü Kirill Rubinski ilə “SAMRUK-QAZYNA” Sərvət Fondunun rəhbəri Nurlan Jakupovun görüşündə birgə layihələrin perspektivləri, beynəlxalq telekommunikasiya marşrutlarının genişləndirilməsi və rəqəmsal texnologiyalar sahəsində əməkdaşlığın gücləndirilməsi müzakirə olunub.
GDP xəbər verir ki, görüşdə xüsusi diqqət Transxəzər Fiber-Optik Layihəsinə yönəldilib. NEQSOL Holdinqin tərkibindəki AzerTelecom ilə “SAMRUK-QAZYNA” ASC-yə daxil olan Kazakhtelecom ASC arasında tərəfdaşlıqla reallaşdırılan bu strateji layihə Xəzər dənizinin dibi ilə sualtı fiber-optik rabitə xəttinin çəkilişini nəzərdə tutur. Təxminən 380 km uzunluğunda olacaq xətt Qazaxıstanın Aktau şəhərini Azərbaycanın Sumqayıt şəhəri ilə birləşdirəcək və Xəzər regionunda ilk sualtı fiber-optik kabel olacaq.
Kirill Rubinskinin sözlərinə görə, beynəlxalq texnoloji şirkətlər yeni və dayanıqlı marşrutlara böyük tələbat göstərir: “Transxəzər Fiber-Optik Layihəsi regionu qlobal data infrastrukturu şəbəkəsində əsas mərkəz kimi mövqeləndirir”.
Layihə hazırda aktiv icra mərhələsindədir. Onun tamamlanması etibarlı məlumat ötürülməsini təmin edəcək, rəqəmsal infrastrukturun inkişafını dəstəkləyəcək və regionda məlumat mərkəzlərinin, beynəlxalq böyük texnologiya şirkətlərinin cəlb olunması üçün şərait yaradacaq.
Müzakirələr zamanı Transxəzər Fiber-Optik Layihəsinin TRIPP və Orta Dəhliz kimi beynəlxalq və regional təşəbbüslərə daxil edilməsi, habelə bu istiqamətdə birgə addımlar da nəzərdən keçirilib.
Görüş tərəflərin yüksək səviyyəli tərəfdaşlığını, regional data mərkəzləri və rəqəmsal mərkəzlər də daxil olmaqla irimiqyaslı infrastruktur layihələrini həyata keçirmək, həmçinin digər sahələrdə, o cümlədən mineral ehtiyatların çıxarılması istiqamətində potensial əməkdaşlıq üçün ortaq öhdəliyini təsdiqləyib.
Qeyd edək ki, NEQSOL Holding telekommunikasiya, enerji, yüksək texnologiyalar, tikinti və mədən sənayesi sahələrində 11 ölkədə fəaliyyət göstərən beynəlxalq şirkətlər qrupudur. AzerTelecom isə NEQSOL Holdinqin tərkibindəki Azerconnect Qrupunun bölməsi olaraq Azərbaycanda magistral internet provayderidir.
